Dikur numri një i botës, e një prej tenistëve më spektakolarë, Rafa Nadal po e ka të pamundur të rigjejë formën e duhur pas një viti të kaluar me dëmtime të njëpasnjëshme.
Spanjolli nuk arriti për herë të parë në 2015-ën të fitojë një titull Grand Slam, diçka që e kishte bërë që nga viti 2004. Teksa dha shenja se po përmirësohej, turneu i parë i madh i vitit, Australian Open, rezultoi një dështim i plotë për të, duke u mundur që në ndeshjen e parë nga bashkëkombasi Fernando Verdasco.
Fati i keq e ka ndjekur dhe në Brazil, në turneun Rio Open, ku është eliminuar në gjysmëfinale nga uruguajani Pablo Cuevas, i 45-ti në listën botërore të tenisit. Nadal do ta fitonte setin e parë me tiebreak, 7-6, për t’u dorëzuar në dy të tjerët, që i humbi 6-7 dhe 4-6.
Ndeshja e luajtur në të gdhirë të së shtunës la shije të hidhur te tenisti spanjoll. “Humba një mundësi. Duhet ta pranoj atë dhe të vazhdoj të punoj për ta ndryshuar dinamikën.”
Kampioni i 14 Grand Slam-eve renditet i pesti në klasifikimin botëror të tenistëve, por prej kohësh e ka humbur shkëlqimin e dikurshëm. /tesheshi.com/
