Një makineri e pandalshme në fushat me dhé, numri pesë në renditjen botërore të tenistëve ka fituar dje turneun e Barcelonës.
Rafael Nadal ka mposhtur në finale austriakun Dominic Thiem, duke fituar kështu të dytin turne radhazi në pak ditë.
Finalja ndaj austriakut Theim ka qenë e furishme, aq sa fitorja 2-0 ka ardhur pas vetëm 90 minutave. Setet kanë përfunduar 6-1 dhe 6-1, dëshmi e qartë e dominimit të spanjollit, mjeshtër të këtyre fushave.
Ky ishte titulli i dhjetë i fituar nga Nadal në Barcelona Open, që vetëm një javë më parë e fitoi për herë të dhjetë dhe trofeun e turneut Monte Carlo Masters.
Kundërshtari i djeshëm e kishte mundur Nadal-in vitin e shkuar në Argentina Open, e po ashtu do të vinte në finale pas fitores ndaj numrit një të botës, Andy Murray, por asgjë prej këtyre nuk do ta ndihmonte për t’i mbijetuar lojës së rrufeshme të spanjollit.
Rafael Nadal po përgatitet për Grand Slam-in e dytë të vitit, për French Open-in, të cilin e ka fituar nëntë herë, si askush tjetër, po ku mungon në finale prej dy sezonesh. /tesheshi.com/
