Lucas Pouille, një tenist që nuk është as mes 20 më të mirëve në renditjen botërore, e që vetëm një herë ka arritur në çerekfinale të një turneu të madh, i ka suprizuar të gjithë kur ka eliminuar Rafa Nadal-in nga US Open.
Përndryshe, Nadal, tanimë 30-vjeçar, nuk ka luajtur në një çerekfinale Grand Slam-i që prej French Open-it të vitit të shkuar, e po ashtu nuk ka fituar një turne që prej atij po të French Open-it në vitin 2014.
Ndeshja mes Nadal-it dhe francezit Pouille ka zgjatur katër orë e 11 minuta, për t’u vendosur në fund me tie-break.
Pouille e ka mposhtur spanjollin 3-2, duke i dhënë që në fillim shenjat për një takim të luajtur fort. Francezi e ka fituar 6-1 setin e parë, me spanjollin që përgjigjet duke fituar të dytin 6-2. Pouille rikthehet të fitojë setin e tretë 6-4, ndërsa kundërshtari e çon takimin në barazim me fitoren 6-3 të setit të katërt.
Seti final ka qenë një dramë më vete, dhe ka zgjatur plot një orë e 11 minuta. Në fund, Pouille ia ka dalë ta fitojë setin 7-6, me tie-break-un në shifrat 8-6.
“Unë luftoj deri në fund,” deklaroi Nadal pas eliminimit. “Kishte gjëra që mund t’i bëja më mirë. Kisha qëndrimin e duhur. Luftova gjer në topin e fundit.”
Megjithatë, Nadal e pranoi se kundërshtari kishte bërë një ndeshje të mirë. “Mendoj se ai bëri një ndeshje të mirë. Ai filloi fuqishëm.”
Me largimin e Nadal-it, US Open humbet një prej pretendentëve për ta fituar atë. Nadal e ka fituar më herët dy herë këtë turne, në vitin 2010 dhe 2013. /tesheshi.com/
