Tekniku 57-vjeçar spanjoll do të bënte një kapërcim të frikshëm në muajt e parë të vitit të shkuar. Nga stoli i Realit të Madridit do të ulej në atë të Njukasëllit, një skuadër që po vuante fort në kampionatin anglez.
Dhe kur Njukasëlli nuk ia doli të qëndronte në Premier League, askush nuk priste që njeriu i cili kishte drejtuar më herët Liverpulin apo Çelsin të vijonte punën në Championship.
“Dashuria që mund të ndjeja nga tifozët ishte një ndikim i madh për mua,” deklaronte ai në maj të 2016-s, kur vendosi të qëndrojë te Njukasëlli edhe pse sezoni në vijim do të ishte në një kategori inferiore.
Fitorja 4-1 e së hënës ndaj Prestonit i ka garantuar Njukasëllit vendin e dytë në Championship, të përkthyer në ngjitje në Premier League në sezonin e ardhshëm.
Benitez, që ka një rol kryesor në suksesin e Njukasëllit, ka deklaruar për mikrofonin e BBC-së: “Mendoj se është një arritje shumë e rëndësishme për çdokënd, sepse duhet të jeni të fortë mendërisht dhe të vazhdoni kështu për shumë muaj. Ishte një detyrë e vështirë, ngaqë është një kategori e vështirë.”
Me shumë përvojë, me shumë skuadra të drejtuara që nga Spanja, Anglia e Italia, Rafa Benitez do të shkarkohej në mënyrë jo fort të hijshme janarin e 2016-s nga detyra te Reali i Madridit, për ta vijuar karrierën e trajnerit në mars e më tutje te Njukasëlli, ku tani i gëzohet suksesit. /tesheshi.com/
