Mediat sportive bëjnë të ditur se është arritur marrëveshja midis Juventusit dhe një klubi kinez, Hebei Fortune, për shitjen e brazilianit Hernanes.
Negociatat kanë qenë të suksesshme, dhe kontrata do të nënshkruhet me t’u kryer vizita mjekësore.
Hernanes, një ish-lojtar i përfaqësueses braziliane, do të gjejë te ekipi kinez emra të njohur, si Lavezzi, Mbia, apo Gervinho, si dhe trajnerin Manuel Pellegrini.
Ndërsa luajti më herët në Itali për Lacion e Interin, Hernanes e çoi sezonin e shkuar dhe gjysmën e këtij sezoni te Juventusi.
Një periudhë jo e kënaqshme për 31-vjeçarin, që u aktivizua në vetëm 24 ndeshje në kampionat me bluzën e Juventusit e shënoi veç dy gola.
Hernanes është më i fundit futbollist që vendos ta vijojë karrierën në Kinë. Mes atyre që u transferuan në klubet kineze gjatë janarit ishte dhe Pato, një bashkëkombas i tij, i cili aktivizohej për Vilarealin në Spanjë. /tesheshi.com/
