Policia e Kosovës ka njoftuar se janë shtuar radhët në kufi për shkak të fluksit të mërgimtarëve që arrijnë në Kosovë për festat e fundvitit. Në njoftimin e Policisë thuhet se është shtuar personeli për ta evituar çdo pritje të gjatë.
“Policia e Kosovës ka filluar të punojë me numër të shtuar të personelit policor në pika kufitare me qëllim të aplikimit të punës së kontrollit kufitar të përshpejtuar, për të shmangur pritjet e gjata dhe për t’ju mundësuar qytetarëve, bashkatdhetarëve tanë kalim më të shpejtë të kontrollit kufitar”,- thuhet në deklaratën e policisë.
Informacionet e orës 13:00 tregojnë se në Merdare (Podujevë) në hyrje për në RKS, është krijuar kolonë e gjatë prej rreth (2 KM), dhe pritjet zgjasin rreth (4-6 orë), varësisht prej frekuentimit të automjeteve.
Ndërsa në pikë-kalimin kufitar tek Dheu i Bardhë (Gjilan), në hyrje për në RKS, kolona është (300-400 metra) dhe pritjet zgjasin rreth gjysmë ore (30–50 min), varësisht prej frekuentimit të automjeteve.
Kurse në pikë-kalimin kufitar Mutivodë (drejtimi i fshatit Keçekollë) në hyrje për në RKS, nuk ka pritje të gjata, pritet afërsisht vetëm ( 15-20 minuta). Sa i përket daljeve nga RKS, drejt SRB nuk pritje fare përveç pritjeve normale që zgjasin vetëm (5-10 min).
Nga ana e zyrtarëve policor të Policisë së Kosovës, puna është duke u zhvilluar normalisht me kapacitete dhe intensitet të shtuar, por radhët e gjata të pritjes janë duke u shkaktuar si rezultat i fluksit të madh të automjeteve, kryesisht në dalje të RKS-së, si dhe procedurave që aplikohen gjatë plotësimit të dokumenteve për kalim kufitar./tesheshi.com/
