Ministria e Mbrojtjes dhe Drejtoria e Kufirit dhe Migracionit pranë Policisë së Shtetit reaguan me një deklaratë të përbashkët kundër pretendimeve të Drejtorit të Përgjithshëm Haki Çako në lidhje me mosfunksionimin e sistemin të radarëve në det.
Çako pak ditë më parë, i është drejtuar me anë të një letre ministrit të Brendshëm në detyrë Dritan Demirajt, duke i shprehur shqetësimin se radarët që bëjnë monitorimin e hapësirës detare në Shqipëri nuk punojnë.
Duke dhënë shembuj konkretë, Çako ka bërë me dije se disa prej operacioneve nga ana e policisë për kapjen e gomoneve me drogë, kanë dështuar pasi nuk janë dhënë informacione për vendndodhjen e saktë të tyre.
Në këtë deklaratë, thuhet se sistemi i integruar i vëzhgimit të hapësirë detare, një sistem i instaluar në vitin 2009, është plotësisht funksional.
Sipas deklaratës së përbashkët, ky sistem vëzhgon dhe monitoron hapësirën detare të Republikës së Shqipërisë 24 orë në 7 ditë të javës.
“Qendra Ndërinstitucionale Operacionale dhe strukturat e tjera të sigurisë kanë përmbushur detyrimet e veta ligjore, në mënyrën më të mire të mundshme”, thuhet në deklaratë.
Ajo që bie në sy është fakti se pretendimet e Çakos janë rrëzuar edhe nga Drejtoria e Kufirit dhe Migracionit, e cila është strukturë varësie e Policisë së Shtetit. /tesheshi.com/
