Radarët e dislokuar prej 9 vitesh në Himarë nuk arrijnë të identifikojnë në det mjetet lundruese si gomone apo skaf.
Qendra Ndërinstitucionale Detare e Radarëve, që ndodhet në Himarë, prej 3 vitesh nuk ka furnizim të vazhdueshëm me energji elektrike. Ky fakt bëhet i ditur nga burime kofidenciale, që thanë se prej kohësh një raport i hollësishëm qëndron edhe në pikën kufitare dhe të migracionit, raporton abc news.
Një fakt tjetër interesant është se këta radarë nuk arrijnë të kapin mjetet e vogla lundruese si gomone apo skaf. Të vetmet mjete që mund të identifikojnë janë, tragetet dhe peshkarexhat.
Ndër të tjera, raporti evidenton se kur jepej sinjali nga qendra ndërinstitucionale për praninë e një mjeti lundrues në det, shpeshherë Delta Forca ndiqte dijet e saj detare, pasi saktësia e radarit lë shumë për të dëshiruar.
Institucionet pjesëmarrëse tek qendra e radarëve në Himarë janë Roja bregdetare, policia kufitare, drejtoria e përgjithshme e doganave, drejtoria e peshkimit dhe drejtoria kombëtare e bregdetit.
Një ditë më parë, kreu i Policisë së Shtetit, Haki Çako denoncoi mosfunksionimin e radarëve, gjë që sipas tij pengonte punën e policisë. Por ishte i menjëhershëm reagimi i Ministrisë së Mbrojtjes e cila e përgënjeshtroi këtë fakt. /tesheshi.com/
