Rada Trajkoviç, një mjeke nga Graçanica, politikane veterane e serbëve të Kosovës, por kundërshtare me Aleksandar Vuçiçin ka deklaruar se arrestimi i Marko Gjuriçit në Mitrovicën e Veriut ishte një “show”.
Sipas saj, gjithçka ishte kurdisur në prapaskenë dhe palëve u duheshin veprime që të hidhnin hi në sytë e opinionit publik.
Trajkoviç theksoi gjatë një interviste në agjencinë serbe FoNet, se nuk beson se do të nënshkruhet një marrëveshje obliguese Kosovë-Serbi, por situata do të qëndrojë pezull edhe për një farë kohe.
Ajo shtoi që serbët do të rikthehen në qeverinë e Kosovës, por sipas saj zvarritja e procesit ndihmon vetëm Serbinë.
Trajkoviç, nga ana tjetër tha se ndarja e Kosovës paraqet “zgjidhjen më të keqe”. Duke analizuar ngjarjen e Mitrovicës së Veriut, Trajkoviç tha se “gjatë arrestimit të Marko Gjuriqit është përdorur forcë e tepërt, por populli nuk e kishte të qartë se çfarë po ndodhte”.
Përfaqësuesja e politikës pranë ish-presidentit Boris Tadiç mendon se në Kosovë dhe rreth Kosovës aktualisht për shumë gjëra “po arrihen marrëveshje në prapaskenë” dhe se “është thjesht e pabesueshme që të mos jetë arritur një marrëveshje e tillë edhe për atë që ndodhi në Mitrovicë”. /tesheshi.com/
