Trajnerët me lëkurë të errët nuk janë në të njëjtin pozicion si të tjerët, tha Patrick Vieira, trajneri i Crystal Palace, në një intervistë për BBC.
Ish-lojtari i kombëtares franceze është aktualisht trajneri i vetëm me ngjyrë të errët në Premier Ligën angleze, dhe një nga të paktët strateg me ngjyrë të errët në ligat më të forta evropiane.
“Nuk mund të them se dera është e hapur për trajnerët me ngjyrë të zezë. Shikoni vetëm klubet evropiane dhe sa prej nesh janë në stolat e trajnerëve të ekipeve të para edhe pse jemi po aq të mirë sa gjithë të tjerët. Por ne nuk kemi mundësi ta dëshmojmë, nuk jemi në të njëjtin pozicion”, tha 46-vjeçari, i cili para Crystal Palace, ka trajnuar në Francë dhe SHBA.
“Nuk dua vetëm të qëndroj në postin e trajnerit, pasi ka shumë pak njerëz me ngjyrë të errët në stafet profesionale të klubeve, drejtuesve dhe strukturave të tjera të klubit”, shtoi Vieira.
Gjatë karrierës së tij të gjatë dhe të pasur si lojtar, Vieira luajti për disa klube, por më së shumti njihet për 10 sezonet e luajtura në fanellën e Arsenalit të Londrës, në radhët e të cilit fitoi tre tituj kampion. Ai fitoi pesë tituj të tjerë në Itali – katër me Interin dhe një me Milanin. Është mbajtës i Urdhrit të Legjionit të Nderit për fitimin e titullit kampion bote me fanellën e kombëtares franceze në vitin 1998. /tesheshi.com/
