Rabinët izraelitë kanë miratuar praktikën e poligamisë, me qëllim që të kundërshtojnë atë që ata besojnë se është një kërcënim demografik që vjen nga popullatat arabe që jetojnë në Izrael dhe në territoret e pushtuara palestineze.
Një ekspoze nga kanali televiziv izraelit Channel 10, zbuloi se kjo praktikë është miratuar nga rabinët të cilët kanë inkurajuar dhe kanë lehtësuar në mënyrë aktive poligaminë, duke pretenduar se kjo praktikë do t’u japë atyre një avantazh në garën demografike kundër arabëve në Izrael.
Një rabin i cili ka qenë i martuar për 26 vjet, është filmuar fshehtazi nga një gazetar, duke bindur një grua për të bërë bashkëshortja e tij e dytë.
“Nëse prindërit tuaj të pyesin se pse nuk po martohesh si gjithë të tjerët”, ai i thotë asaj: “thuaju atyre se është një mitzvah – urdhër fetar – dhe unë dua të bëj një mitzvah.”
Rabini i tregoi gazetarit një letër të nënshkruar nga shefi i rabinëve të Jeruzalemit, Shlomo Amar, që i lejon atij të martohet me një grua të dytë.
Duke raportuar këtë histori, The Times of Israel komentoi se “edhe pse ligji hebre e ndalon një grua të martohet me më shumë se një burrë, një praktikë e njohur si poliandria, ajo e lejon një burrë të martohet me më shumë se një grua.”
“Ka disa raste të poligamisë në Bibël, përfshirë edhe dy nga tre patriarkët (Abrahami dhe Jakobi) dhe shumë prej mbretërve. Ligji hebre jep udhëzime për rrethanat në të cilat poligamia është e lejuar”, ka shpjeguar The Times of Israel.
Gazeta izraelite pretendon gjithashtu se ka raste jashtë Izraelit, kryesisht brenda komuniteteve sefardikë, ku një burrë i cili refuzon ta divorcojë gruan e tij, i jepet leja nga rabini që të rimartohet. Kjo lë gruan e parë si një aguna, apo grua të prangosur, e cila është e ndaluar me ligj hebre të rimartohet.
Një zëdhënës i një grupi për dominim demografik pro-çifut, The Complete Jewish Home, tha për Channel 10: “Kemi të bëjmë me burra dhe gra të cilët kanë përgjegjësi, dhe kjo është një zgjidhje për problemin në situatën kur kemi më shumë femra të vetme se sa meshkuj që kërkojnë të martohen. Kjo gjithashtu siguron shumicën demografike hebreje në vend dhe garanton të drejtën e grave fetare për t’u bërë nëna.”
Edhe pse poligamia ka qenë e paligjshme në Izrael që nga viti 1977, në praktikë autoritetet në masë të madhe kanë mbyllur njërin sy. /tesheshi.com/
