“Ra ky mort e u pamë”, fraza simbol e Kadaresë nga libri i tij me të njëjtin titull kushtuar krizës kosovare, është aktualizuar dhe në rastin e përgatitjeve për ceremoninë mortore të ish-presidentit francez Zhak Shirak.
Dy liderët politikë shqiptarë, Edi Rama dhe Hashim Thaçi, të ndodhur dhe ata në ceremoni, janë takuar me ish-presidentin Cliton.
Fotografitë ku shihen të tre së bashku i ka publikuar kreu i qeverisë shqiptare.
“Paris, Hotel de Marigny – Në vigjilje të shërbesës ceremoniale për të ndjerin, Presidentin Zhak Shirak”, ka shkruar Rama.
Zhak Shirak ndërroi jetë pak ditë më parë, më 26 shtator, në moshën 86-vjeçare.
Lidhur me vdekjen e tij kanë reaguar të gjithë liderët e politikës kosovare, për faktin se i ndjeri u rreshtua, ndonëse me vështirësi, krah shteteve perëndimore që mbështetën bombardimin e Serbisë nga NATO-ja.
Shirak ishte i fundit burrështetas që u pajtua për ndërhyrjen që i dha fund luftës në Kosovë, dhe këtë e bëri pas presionit amerikan, më saktë të ish-homologut Bill Clinton. /tesheshi.com/
