Qyteti shqiptar që mbajti emrin e vajzës së Musolinit

Arkivi Shtetëror ka kujtuar faktin se Saranda pati një kohë – në periudhën italiane – një emër vajze. U quajt “Porto Edda”.

“Me vendim qeverie të vitit 1939, për nder të vajzës së Musolinit, Saranda u pagëzua me emrin ‘Porto Edda’. Falë ruajtjes së kujdesshme, e kaluara e qytetit materializohet në arkitekturën e bukur mesjetare dhe në monumentet antike historike”, shkruan Arkivi vetëm dy fjali për këtë aspekt të veçantë të së kaluarës së një qyteti, i cili është i gjithi mbi rrënoja antike.

Saranda quhej Onhezmi në lashtësi, por kuptimin e emërit e ka mesjetar, pasi bazohet te 40 shenjtorët, Manastiri me të njëjtin emër që ndodhet kodrën ku shtrihet qyteti.

Edhe pse ky fakt mund të jetë mjaft tërheqës për turizmin, nisur statusi turistik i qytetit, nuk ekziston ndonjë potencim i llojit fizik apo promovues që ky qytet mbajti dikur emrin e të bijës së Musolinit.

Saranda ka një pjesë të saj me ndërtime të stilit italian, një qytet i dashur për ta ku ata lanë gjurmët e tyre. Ky afeksion vijon sot në kontekst të turizmit me shumë italianë që vijnë për të pushuar në Sarandë.   /tesheshi.com/