Autoritetet lokale në qytetin Primorski, afër Shën Peterburgut në Rusi, kanë përfunduar në “syrin e ciklonit” pasi kanë tentuar t’i bindin qytetarët se kishin asfaltuar një rrugë, duke përdorur një fotografi të përpunuar me fotoshop.
Sipas raportimeve, administrata lokale kishte njoftuar në internet se kishte mbaruar punimet për rindërtimin e rrugës, duke postuar disa foto nga një pjesë rruge e shtruar.
Për shkak të protestave të banorëve, autoritetet lokale ishin përgjigjur se do të merrnin masa.
Fotoja duket mjaft reale në pamje të parë, por banorët e zonës e dinin shumë mirë si qëndronte e vërteta: nuk ishte riparuar asnjë centimetër rrugë. Rruga në foto vazhdonte të mbetej plot gropa. Kanë qenë të menjëhershme protestat dhe polemikat. Shumë kanë akuzuar se autoritetet janë përpjekur t’i mashtrojnë qytetarët.
Autoritetet janë justifikuar menjëherë se për shkak të ngarkesës së punë kanë bërë një gabim pa dashje, pasi fotoja ishte një përpunim në kompiuter dhe duhet të shërbente si ilustrim për fillimin e punimeve, jo mbarimin e tyre.
Arsyeja duket e pranueshme, ndonëse jo të gjithë i kanë mirëpritur justifikimet e administratës. /tesheshi.com/
