Pesë vjet më parë, qyteza e Cheranit në Meksikë zuri faqet e para të gazetave ndërkombëtare pasi vendosi që të përzërë bandat e fuqishme të drogës që trafikonin në zonë, por bashkë me ta përzuri edhe politikanët dhe policinë, shpesherë të korruptuar dhe në marrëveshje me trafikantët. Sot, qyteti, krejtësisht autonom, shihet me interes nga shumë meksikanë, e jo vetëm.
Historia nisi në vitin 2011. Prej tri vitesh banorët i shikonin trafikantët si i prisnin pemët për të mbjellë në vend të tyre avokado, e cila u sillte mjaft përfitime, aq sa disa trafikantë e preferonin më shumë se marihuanën. Të shqetësuar nga shpyllëzimi, i cili po vinte në rrezik burimet e ujit, banorët vendosën të luftojnë për qytezën e tyre.
“Ishim të shqetësuar; nëse i pret pemët, ka më pak ujë. Burrat tanë janë fermerë; pa ujë çfarë do të pijnë kafshët?”, shpjegon njëra nga frymëzueset e revoltës, Margarita Elvira Romero.
Margarita u përpoq fillimisht të fliste me druvarët, por mori vetëm ofendime dhe kërcënime. Më pas iu drejtuan autoriteteve, por ata e kthyen kokën nga ana tjetër. Kështu, bashkë me një grup qytetarët gjithnjë e në rritje, filluan të bllokojnë kamionët që shkonin në drejtim të pyllit.
Më 15 prill 2011, ata sekuestruan disa sharra. Të bindur se trafikantët do të hakmerreshin, qytetarët u armatosën me sa mundën për t’u mbrojtur.
Druvarët erdhën të shoqëruar nga policia lokale, por pas një përpjekjeje të dështuar dhe një pritjeje të gjatë, vendosën të largohen. Brenda pak ditëve u përzu edhe policia e politikanët, të cilët ishin marrë vesh me druvarët dhe trafikantët.
Partitë u nxorrën jashtë ligjit, pasi krijonin vetëm përçarje; ndërsa u krijua një qeveri lokale dhe një milici e përbërë nga burra e gra, e cila kujdesej për sigurinë e qytezës.
Sot, shkalla e kriminalitetit në qytezën e Cheranit është jashtëzakonisht e ulët në krahasim me atë që ishte më përpara, apo krahasuar me pjesën tjetër të zonës; vetëm dhjetë kilometra larg qytezës, vrasjet dhe vjedhjet janë pjesë e përditshmërisë, ndërsa në Cheran nuk janë parë më vrasje. Por sigurisht, nuk është një parajsë; milicia lokale ka krijuar postoblloqe përreth qytetit nga frika se trafikantët mund të hakmerren. /tesheshi.com/
