Duke filluar nga viti i ardhshëm, vizitorët në udhëtimet njëditore do të duhet të paguajnë një tarifë deri në dhjetë euro për të hyrë në qytetin italian të Venecias, një nga mrekullitë e botës që prej kohësh është rënduar nga turizmi i tepërt.
Masa, e cila u njoftua nga këshilli i qytetit të Venecias të premten, do të hyjë në fuqi më 16 janar 2023.
Turistët që qëndrojnë gjatë natës, fëmijët nën moshën 6 vjeç, pronarët e shtëpive të pushimit, njerëzit që qëndrojnë me vendasit, studentët, njerëzit e biznesit dhe disa kategori të tjera do të përjashtohen.
Simone Venturini, këshilltarja e qytetit për turizmin, e quajti sistemin e ri “mënyrën e vetme” për të kontrolluar turizmin masiv.
“Është një hap i rëndësishëm, është një fazë kyçe dhe ne jemi të parët në botë që e bëjmë këtë”, tha ajo.
Biletat për Venecia do të variojnë nga tre deri në 10 euro, varësisht se sa i ngarkuar është qyteti.
Venturini njoftoi gjithashtu rritje të çmimit të transportit publik dhe atraksioneve turistike.
Nga 1 shtatori, bileta për tragetin do të rritet nga 7.50 në 9.50 euro, ndërsa hyrja në muzetë e Shën Markut do të rritet nga 25 në 30 euro. /tesheshi.com/
