Konflikti mes Arabisë Saudite dhe Iranit ka prekur tashmë dhe Libanin. Mungesa e gatishmërisë së qeverisë libaneze për të qëndruar në krah të Arabisë Saudite e për t’u shprehur në favor të saj, për shkak të ndikimit që ka Hezbullahu mbi të, ka sjellë fillimisht ndërprerjen e ndihmës ushtarake saudite për Libanin. Për t’u pasuar nga një lëvizje tjetër.
Arabia Saudite i ka paralajmëruar shtetasit e vet të mos udhëtojnë drejt Libanit për çështje sigurie. Një njoftim i Ministrisë së Jashtme saudite u bën thirrje “qytetarëve të mos udhëtojnë për në Liban, për sigurinë e tyre, dhe u kërkon qytetarëve që banojnë në Liban apo e vizitojnë atë të mos qëndrojnë nëse nuk është tejet e nevojshme”.
Në të njëjtën kohë, Emiratet e Bashkuara Arabe i ndaluan shtetasit e tyre të udhëtojnë për në Liban, duke e zvogëluar po ashtu praninë diplomatike në Bejrut.
Bahrejni, në të njëjtën linjë, i ka nxitur qytetarët e tij të mos udhëtojnë për në Liban, duke u kërkuar të tjerëve që gjenden atje ta lënë menjëherë vendin.
Qëndrimi armiqësor i Hezbullahut dhe dështimi për ta dënuar agresionin e Iranit pas sulmit mbi ambasadën saudite në Teheran kanë sjellë dhe reagimin e ashpër të Arabisë Saudite ndaj Libanit.
Emiratet e Bashkuara Arabe kanë deklaruar mbështetjen e plotë për Arabinë Saudite.
Kryeministri libanez, Temamm Selam, u përpoq në fillim të kësaj jave ta zbuste situatën, duke premtuar se vendi i tij do të ruante marrëdhënie të mira me Arabinë Saudite. “Libani nuk do ta harrojë rolin e Arabisë Saudite në ndihmën për rindërtimin e vendit pas luftës civile,” do të deklaronte ai pas një mbledhje të qeverisë.
Ish-kryeministri, Saad Hariri, kërkoi më herët që Arabia Saudite të mos e braktisë Libanin, e të vazhdojë ta mbështesë atë.
Lëvizja shiite Hezbullah ka një rol domethënës në jetën politike libaneze, dhe është e mbështetur nga Irani, me të cilin Arabia Saudite është në përplasje të hapur. /tesheshi.com/
