Qytetarët e Preshevës duket se nuk janë të kënaqur me kreun e komunës së tyre, Ragmi Mustafa dhe “sjelljen” e tij gjatë vizitës së kryeministri serb, Aleksandar Vuçiç. Ata e kanë shprehur revoltën e tyre duke shkruar graffiti nëpër mure, ku kërkojnë dorëheqjen e Mustafës.
Agjencia e lajmeve “Presheva jonë”, njofton se në disa pjesë të qytetit janë parë afishe, ngjitur në vende të ndryshme publike me fotot e heqjes së lapidarit nga forcat serbe disa kohë më parë dhe kundër mirënjohjes së shprehur nga Mustafa gjatë vizitës së Vuçiç.
“Mirënjohje Vuçiçit, dorëheqje popullit”, shkruhej në postera, ndërsa grafitet ishin më të prera: “Ragmi, ik!”. Disa nga këto afishe janë fshirë nga policia sebe e cila po ben hetime për autorët.
Dekorimi i kryeministrit serb, Aleksandar Vuçiç nga kryetari i komunës në Preshevës, Ragmi Mustafa, ka sjellë reagime edhe nga veteranët e luftës, subjektet politike dhe shoqëria civile. Në këto reagime ata shprehen të turpëruar me këtë veprim të Mustafës, duke thënë se çelës i zgjidhjes së problemeve të shqiptarëve është pikërisht kryeministri serb, ndërkohë që dekorimi i tij sipas tyre është servilizëm i skajshëm dhe fshehje e realitetit në Luginë. /tesheshi/
