Nga Bashkim Kastrati
Parku i Gërmisë është parku më i madh në Prishtinë dhe rrjedhimisht më i frekuentuari nga qytetarët. Në këtë park qytetarë të shumë dalin për të ecur, për të marrë ajër të pastër dhe për t’u relaksuar. Por një pjesë e madhe e këtyre vizitorëve nuk munden që ta vizitojnë një pjesë të këtij parku për shkak se mungojnë teleferikët.
Iniciativa për të pasur teleferikë në një pjesë të Gërmisë ishte marrë qysh në vitin 1987. Këtë iniciativë e patën marrë një grup i sportistëve që për ide kishin krijimin e një qendre të skijimit.
Shtegu ka qenë i gjatë 1 kilometër e gjysmë për të shkuar lartë, ndërsa kthimi me ski është paraparë që të jetë tri kilometra dhe është vlerësuar se do të jetë shumë atraktivë për vizitorët.
Kur projekti i ishte realizuar pothuajse në tërësi, situata politike në Kosovë ishte përkeqësuar dhe nuk është arritur që të vihet në funksion asnjëherë. Por baza e këtij projekti ka mbetur në një pjesë të parkut të Gërmisë.
Aty shihen shtyllat e teleferikut, disa janë të dëmtuara nga qytetarët, e disa janë thuajse të kompletuara.
Ndërsa çka është më e keqja nuk ka ndonjë indikacion se këta teleferikë mund të funksionalizohen dhe të vihen në shërbim të qytetarëve.
Në lidhje me këtë çështje tesheshi.com i ka dërguar pyetje Zyrës për Informim të Komunës së Prishtinës se a ka ndonjë plan për funksionalizimin e teleferikëve në këtë park, por edhe pas pritjes për 13 ditë, nuk kemi marrë asnjë përgjigje.
Qytetarët: Teleferiku do të ishte i mirëseardhur
Qytetarët që vizitojnë parkun e Gërmisë thonë se funksionalizimi i teleferikut do të ishte i mirëseardhur dhe do t’i ndihmonte shumë qytetarëve që ta vizitonin edhe atë pjesë malore të Gërmisë. Sipas tyre, teleferikët do të ndikonin që të shtohej numri i vizitorëve dhe sigurisht edhe të hyrave financiare.
“Unë në parkun e Gërmisë vijë shumë shpesh, pothuajse çdo vikend. Kaloj edhe këtej ku janë teleferikët dhe mendoj që është shumë keq që këta teleferikë nuk janë në funksion të vizitorëve, sidomos në stinën e dimrit, e që besoj shumë njerëz do të ishin kureshtarë që t’i përdornin këta teleferikë për skijim apo për të parë natyrën me borë. Shpresoj që institucionet të bëjnë diçka në këtë drejtim, pasi që baza e tyre ekziston duhet edhe pak punë që të funksionalizohen”, thotë Dradan Berisha.
Ndërsa Bujar Hoxha, thotë se teleferikët do të ishin të nevojshëm në të gjitha stinët dhe se do ta bënin Gërminë një park të frekuentuar jo vetëm për qytetarët e Prishtinës, por edhe për qytetarë të komunave tjera.
“Në atë pjesën ku po shihen teleferikët nuk kam qenë asnjëherë, sepse është më lartë, por do të kisha pas dëshirë që të shkojë. Mendoj që nëse do të kishin punuar këta teleferikë do të kishte shumë vizitorë që do ta kishin vizituar parkun e Gërmisë edhe verës, por edhe dimrit, pasi që ky park në të gjitha stinët të ofron mundësi për relaksim. Gjithashtu këta teleferikë do të shërbenin edhe për pleq, ose ata persona që nuk kanë mundësi që të ecin shumë apo kanë probleme tjera dhe nuk ta vizitojë këtë pjesë të Gërmisë. Shpresoj që institucionet të bëjnë diçka në këtë drejtim, pasi që besoj që investimet për këta teleferikë do t’i nxirrnin shumë shpejt, pasi që kërkesa do të ishte e madhe”, thotë ai. /tesheshi.com/
