Nga Bashkim Kastrati
Vendimi i Qeverisë së Kosovës për të ulur TVSh-në për produkte elementare si mielli, orizi, vezët dhe qumështi, nuk ka ndikuar fare tek gjepi i qytetarëve. Ata thonë se pakoja fiskale e qeverisë vetëm sa ka ndikuar që kostoja të jetë më e madhe për produktet e përditshme. Ndërsa sa i përket produkteve për të cilët është ulur TVSh-ja, qytetarët thonë se nuk ka fare ulje të çmimeve.
Shqipe Morina thotë se shpenzimet e saj për produkte elementare janë të njëjta dhe se nuk ka vërejtur asnjë ndryshim. Ajo thotë se nga kjo po fitojnë vetëm pronarët e bizneseve që i shesin këto produkte, pasi që kanë ulje të TVSh-së dhe produktet i shesin me çmim të njëjtë, ndërsa taksa paguajnë më pak.
“Nuk ka fare ulje të çmimeve të gjitha produktet për të cilat është ulur TVSh-ja, realisht e kanë çmimin e njëjtë, si buka, orizi, vezët, unë nuk kam vërejtur se janë ulur. Çmimi i bukës është i njëjtë. Ja për shembull tash sapo kam blerë një byrek dhe një jogurt dhe këto dy produkte bëjnë 1 euro e dhjetë centë. Këto dy produkte edhe para pakos fiskale kanë qenë në këtë çmim dhe me këtë çmim janë edhe tash”, thotë ajo.
Ndërsa Valon Hoxha thotë se pakoja fiskale ka ndikuar vetëm negativisht tek gjepi i qytetarëve, pasi që disa produkte janë shtrenjtuar, e ato që është paraparë që të ulën nuk kanë ndryshuar fare.
“Produktet që është dashtë të ulën, nuk janë ulur fare, por kanë mbetur të njëjta, ndërsa çmimet tjera janë rritur. Barnat janë shtrenjtuar dhe shumë produkte tjera po ashtu. Kjo pako fiskale nuk është fare në dobi të qytetarëve”, u shpreh ai.
Edhe ASK konfirmon, pakoja fiskale nuk i uli çmimet
Agjencia e Statistikave të Kosovës i ka përforcuar edhe më shumë deklaratat e shumë qytetarëve, të cilët nuk kanë vërejtur ndikimin e uljes së tatimit mbi vlerën e shtuar.
Sipas të dhënave të kësaj agjencie, çmimet për një pjesë të produkteve u ulën, jo për shkak të uljes së TVSH-së, por nga ulja e çmimeve në berëzat ndërkombëtare.
Sipas ASK-së, ka pasur edhe rritje të produkteve që me vendimin e qeverisë do të ishin dashur të ulen. Këto produkte janë djathi, qumështi dhe vezët të cilat janë rritur për 2 për qind.
Qeveria duhet t’i sanksionojë kompanitë për moszbatim të normave të reja fiskale
Lulzim Beqiri magjistër i ekonomisë, ka thënë për tesheshi.com se pakoja e re fiskale po cilësohet si njëra nder arritjet me të mëdha të vitit 2015 nga ana e institucioneve të Kosovës, ndërsa praktika ka dëshmuar se kjo pako ka luajtur shume pak efekt në uljen e kostos se shportës se konsumatorit siç është parashikuar me rastin e uljes se TVSH, nga 16% në 8% për produktet esenciale.
“Buka si produkt esencial vazhdon të jetë po me të njëjtin çmim që ishte edhe pse ulja e TVSh-së parasheh uljen e çmimit të bukës, gjithashtu edhe produktet tjera kanë të njëjtin tretman nga ana e shitësve”, thotë Beqiri.
Ai thotë se qeveria e Kosovës kishte miratuar pakon e re fiskale duke ulur normën e TVSh-së për produktet esenciale por përveç pompozitetit gjepi i konsumatorit prapë po dëmtohet.
Sipas tij, në këtë situatë duhet që të ndërhyjë qeveria që të sanksionojë kompanitë të cilat nuk i përfillin pakot e reja fiskale.
“Qeveria e vendit do të duhet që t’i sanksionojë kompanitë për moszbatim të normave të reja fiskale sepse po dëmtohet rëndë konsumatori edhe ashtu i rënduar nga gjendja ekonomike e sociale e tij”, theksoi Beqiri. /tesheshi.com/
