Nga Bashkim Kastrati
Ndërtimi i Termocentralit “Kosova e Re” do të bëjë të mundur që Kosova të sigurojë energji elektrike të mjaftueshme dhe të mos ketë nevojë që të blejë dhe ndërtimi i këtij termocentrali nuk do të ketë fare kosto për buxhetin e shtetit të Kosovës. Por kjo është vetëm njëra anë e medaljes sepse koston më të lartë do ta paguajnë qytetarët pasi që pas hyrjes në funksion të këtij termocentrali çmimi i energjisë do të rritet për 28 për qind.
Këtë rritje të çmimit të energjisë elektrike e ka bërë të ditur edhe ministri i Zhvillimit Ekonomik, Blerand Stavileci.
“Çdo investim përcillet ka kosto dhe çdo kosto ka reflektim. Te ndërtimi i Kosovës së Re ndikimet do të jenë për 28 për qind në çmimin e energjisë elektrike në gjashtë vitet në vijim”, ka bërë të ditur Stavileci.
Ai ka thënë se termocentrali “Kosova e Re” do të ndërtohet pa kapital të investuar nga shteti, derisa lokacioni do të jenë në afërsi të Termocentralit Kosova B në Obiliq deri sa do të jetë me një bllok me kapacitet prej 500 megavat orë energji eklektike.
Stavileci ka shtuar se termocentrali “Kosova e Re” krijon siguri dhe stabilitet për furnizim me energjie elektrike. Kapacitet e reja sipas tij kanë rëndësi të madhe për bizneset të cilat për shkak të mungesës së rrymës kanë humbur deri ën 300 milionë euro.
Qytetarët: Shtrenjtimi i rrymës për 28 për qind i papërballueshëm
Me të marrë vesh se ndërtimi i termocentralit “Kosova e Re” do të rritë shumë çmimin energjisë elektrike, qytetarët nuk e kanë pritur mirë këtë lajm, ndërsa thonë se edhe kostoja e tanishme është shumë e lartë dhe se rritja për 28 për qind e çmimit të rrymës është e papërballueshme.
Besa Bytyqi thotë se kjo rritje do të shkaktojë pakënaqësi tek qytetarët pasi që të hyrat mujore që i marrin aktualisht nuk dalin për t’i mbuluar shpenzimet e mëdha që janë nga me të ndryshmet.
“Me ju thënë të drejtën kur dëgjova që po ndërtohet më në fund ky termocentral u gëzova, edhe atë për dy arsye, e para se e rregullon çështjen e reduktimeve dhe ndoshta nuk na ndalet rryma më dhe e dyta kjo puna e termocentralit është bërë histori, se ka shumë vjet që po flitet, e vetëm sa iu pat ndërrua emri dhe i ndryshonin kapacitetet nga 2000 megavat, ka rënë në 500. Por të gjitha në rregull, por nëse çmimi do të rritet siç është thënë për 28 për qind, me të vërtetë është e papërballueshme, sepse vetëm nëse punojmë për të paguar fatura të rrymës”, thotë ajo.
Ndërsa Burim Kurti thotë se shtrenjtimi i faturave të rrymës deri në 28 për qind, i dëmton jashtëzakonisht qytetarët, por edhe bizneset. Ai thotë se kjo rritje do të ndikojë edhe tek rritja e përgjithshme e çmimeve, pasi që çdo gjë është e lidhur direkt apo indirekt me energjinë elektrike.
“Faturat e rrymës edhe tash janë shumë të shtrenjta, sidomos për ata që ngrohen me nxehëse elektrike, ka raste që një shtëpie i shkon fatura mbi 100 euro dhe kanë vetëm pajisjet elementare shtëpiake. Nëse rritet çmimi i rrymës ende në të ardhmen, do të rriten edhe krejt çmimet tjera, e neve nuk po na mbetet ja me ikë në mal me jetu, ja me ikë prej ktu”, thotë Kurti.
Çmimi i energjisë elektrike me rritje të vazhdueshme
Çmimi i energjisë elektrike është rritur vazhdimisht ndër vite dhe kjo gjë ka shkaktuar pakënaqësi të madhe të qytetarëve, të cilët kundërshtonin rritjen e çmimit të energjisë elektrike, ndërsa në anën tjetër shpreheshin të pakënaqur me furnizimin, për shkak të ndërprerjes së kohëpaskohshme të energjisë elektrike.
Edhe Agjencia e Statistikave të Kosovës (ASK) përmes raporteve të saj kohë pas kohe ka treguar për rritje të çmimit të energjisë elektrike. Edhe në vitin 2015 kishte rritje të energjisë elektrike.
“Në tremujorin e tretë të vitit 2015, sasia e energjisë elektrike në dispozicion të konsumatorëve është 975.3 GWh energji elektrike. Në raport me tremujorin e njëjtë të vitit të kaluar (TM3 2014), sasia e energjisë elektrike të konsumuar është rritur për 8.3 %”, thuhet në njoftimin e ASK-së.
Qytetarët kanë shprehur kohë pas kohe ankesat e tyre kundër faturave të energjisë elektrike. Në fillim të vitit 2013 u protestua për më shumë se një javë kundër “fryrjes” së faturave, dhe qe hamendësuar se ka pasur manipulime me tarifat, përkatësisht me llogaritjen e kilovatëve, pasi që sasia e kilovatëve përcakton edhe çmimin. Pra, numrat e njehsorëve janë marrë me vonesë, dhe kur janë kalkuluar kanë dalë kilovatë më shumë, e rrjedhimisht ka dalë çmimi më i shtrenjtë i energjisë elektrike. Ka patur raste kur fatura ka ardhur deri në pesëfish më e lartë se në muajin paraprak. Gjithashtu, pas shqyrtimit të disa ankesave, qenë gjetur edhe disa gabime në faturim.
Protesta kundër faturave të larta të KEDS-it ka pasur edhe në fillim të vitit 2015, kur qindra qytetarë kanë protestuar para selisë së kësaj kompanie, duke shprehur pakënaqësinë për çmimin e faturave. /tesheshi.com/
