Nga Bashkim Kastrati
Qindra protestues, prodhues dhe përpunues vendorë të qumështit, u nisën me traktorë drejt qendrës së Prishtinës, nga parkingu prapa Pallatit të Rinisë dhe marshuan rrugëve të qytetit, për t’u ndalur pastaj para objektit të Qeverisë.
Protestuesit mbanin në dorë pankarta si: “Stop produkteve me yndyrë bimore”, “Mos konsumo imitim mashtrim!”, “Qeveri shpëto 40.000 vende pune” etj.
Kjo protestë u organizua në shenjë pakënaqësie për mosrealizimin e kërkesave për marrjen e masave për ndalimin e importit ilegal të qumështit.
Prodhuesit dhe përpunuesit vendorë të qumështit kërkojnë, ndërprerjen e hyrjes në treg të qumështit me çmim shumë të ulët, gjë e cila po e vështirëson punën e fermerëve dhe nuk po lë hapësirë në treg për prodhimet e tyre.
Kryetar i shoqatës së prodhuesve të qumështit Naser Bajraktari, ka thënë se sektori i qumështit është me arritjet më të mëdha ekonomike ne Kosovë dhe se Qeveria nuk po mundet t’i mbrojë prodhimet vendore duke lejuar që në Kosovë të futen produkte me imitime të qumështit dhe me çmime të ulëta të cilat i eliminojnë nga tregu prodhimet vendore të qumështit.
Bajraktari ka tutje ka thënë se investimet janë bërë që qumështi të prodhohet dhe të përpunohet dhe ta plasohet në tregun vendor, duke konkurruar me të gjitha produktet e qumështit që vijnë nga jashtë në mënyrë të rregullt dhe të barabartë.
“Kjo nuk po ndodhë, ku tregun e kanë vërshuar prodhimet me yndyrë bimore të cilat vulosin shkatërrimin e këtij sektori të krijuar me mund të madh dhe me vite të tëra”, u shpreh Bajraktari.
Gjithashtu dhjetëra qumështarë nga rajoni i Ferizajt për pak qaste kanë bllokuar të hënën rrugën magjistrale Ferizaj-Shkup, në shenjë proteste siç thanë për politikat e disfavorshme të qeverisë karshi prodhuesve të qumështit. Ata kanë thënë se kjo është vetëm një protestë simbolike, në të kundërtën nëse nuk ndryshon diçka ata do të vazhdojnë me protesta edhe më masive.
Në anën tjetër, drejtuesit e shoqatës së qumështarëve, protestën e kanë vlerësuar si simbolike për t’i treguar kështu qeverisë që mos të dalin me deklarata pompoze për gjoja investimet në bujqësi dhe hapjen e vendeve të punës.
MTI paralajmëron themelimin e një Grupi Punues për mbrojtje nga importi
Në lidhje me protestën e ka reaguar Ministria e Tregtisë dhe Industrisë. Kjo ministri në komunikatën për media ka deklaruar se e ka përcjellë me vëmendje dhe kujdes të shtuar situatën në sektorin e prodhimit dhe përpunimit të qumështit në Kosovë.
“MTI ka pasur kontakte të vazhdueshme me përfaqësues të shoqatave të këtyre bizneseve dhe ka diskutuar për shqetësimet që i kanë ngritur ato në lidhje me konkurrencën nga produktet e importit”, thuhet në komunikatë.
Në komunikatë thuhet se takimin e fundit të mbajtur në MTI me 18 maj, në prezencën e ministres së MTI-së, Doganave të Kosovës, Administratës Tatimore, Agjencisë së Ushqimit dhe Veterinarisë është vlerësuar si nevojë urgjente themelimi i një Grupi Punues Ndër-Institucional duke u bazuar në Ligjin për Masa Mbrojtëse në Importe.
Sipas MTI-së, ky mekanizëm, formimi i të cilit tashmë iniciuar do të mbledh të dhënat e nevojshme dhe do t’i trajtojë kërkesat të cilat kanë për qëllim rregullimin e tregut vendor dhe mbrojtjen eventuale të këtij tregu nga importet.
“MTI-ja në bashkëveprim edhe me institucionet e tjera të Kosovës është e përkushtuar që t’i përkrah prodhuesit dhe përpunuesit vendorë të qumështit dhe për këtë qëllim do të ndërmarr të gjitha veprimet e nevojshme bazuar në legjislacionin në fuqi”, thuhet në komunikatë. /tesheshi.com/
