Autoritetet kineze kanë ndryshuar emrin lokal të një lumi në rajonin e Ningxia, aty ku dominon një popullsi muslimane e etnisë Hui. Lumi quhet Aiyi, që do të thotë Ajshe, një nga gratë e Profetit Muhamed, është emëruar si Diannong.
Diannong është një emër i lashtë për kryeqytetin e Ningxia-s, aktualisht i quajtur Yinchuan.
Zyrtarët kinezë thonë se ndryshimi i emrit të lumit është bërë në përputhje me ligjin e vitit 2013, i cili ndalon që hapësirat publike të kenë emra personash apo vendndodhjesh të huaja.
Shumë e shohin ndryshimin në emër të lumit si lëvizjen e fundit nga qeveria e Pekinit për të forcuar kulturën e Kinës në Ningxia, duke dobësuar atë islame.
Wang Genming, një studiues kinez dhe specialist në çështjet e popullsisë Hui, tha se riemërtimi i lumit “tregon injorancën dhe budallallëkun e qeverisjes vendore”. Ai thotë se Aiyi është emri i një gruaje të bukur nga kjo popullsi.
Ai gjithashtu shtoi se autoritetet lokale larguan nga rafte e bibliotekës më shumë se 860 libra që flasin për përkatësinë etnike të popullit Hui. /tesheshi.com/
