Ndërsa komuniteti ndërkombëtar ka dështuar të sigurojë ndihmë humanitare nëpër territoret e rrethuara siriane, një punëtor humanitar finlandezo-sirian vazhdon të “trafikojë” disa dhurata të cilat janë me gjasë ndër më të kërkuarat: lodra për fëmijët e Sirisë.
44-vjeçari Rami Adham, ka sjellë lodra për fëmijët sirianë gjatë katër viteve të fundit, që nga vizita e tij e parë në një kamp refugjatësh në vitin 2012.
Ai fillimisht ka filluar të sjellë ushqim, ilaçe dhe furnizime tjera humanitare, por vajza e tij 3-vjeçare Jasmin, ka insistuar që ai ta marrë lodrat e saj me vete. Andaj, Adham i shtoi dërgesës së tij edhe 25 arushë dhe 36 Barbie kukulla dhe kështu fillon një traditë të re.
“Herën e parë, ne shkuam në kampin e refugjatëve pranë kufirit. Filluam ta shpërndajmë ushqimin, por kur filluam të shpërndajmë lodra, kjo krijoi një bujë të madhe. Fëmijët po vinin prej gjitha anëve. Kështu kuptova se ata nuk e kishin mendjen te ushqimi, pasi gjithë ajo çfarë dëshironin ishte të kishin një lodër”, thotë Adham.
Adham, i njohur me nofkën “trafikanti i lodrave”, ka kryer 28 udhëtime në Halep përfshirë 12 ilegale, dhe ka shpërndarë 20,000 lodra për fëmijë në qytet dhe kampet e refugjatëve përreth.
Ai ka lindur në Siri dhe ka emigruar në Finlandë në vitin 1988, ku drejton një agjenci për ndihma humanitare të quajtur Shoqata e komunitetit finlandez-sirian, që mbledh lodra nga fëmijët e gjithë Evropës, sponzorizon 420 jetimë në Siri dhe drejton tri shkolla në kampe të ndryshme refugjatësh.
“Ata nuk ndijnë që ne vetëm po ju japim lodra atyre, ata kanë përshtypjen që ne po i mbështesim ata”, thotë ai për NBC Neës. “Ne ju japim atyre sigurinë, duke iu përcjellë mesazhin se pavarësisht se çfarë ndodh me ju, ne jemi këtu për ju”.
