Quajti një doktor të huaj “skllav të zi”, ndjekje penale për shtetasin saudit

Ministria e Shëndetësisë së Arabisë Saudite njoftoi se zyrtarët e saj do të ndërmarrin veprime ligjore kundër një shtetasi vendas, i cili shpërtheu në fyerje raciste kundër një mjeku sudanez, sepse ky i fundit nuk pranoi t’i lëshonte atij një vërtetim të rremë për një pushim mjekësor.

Një audio dy-minutëshe e çiltër, e cila me gjasë u regjistrua përmes një telefoni celular, është duke bërë xhiron nëpër mediat sociale. Në të, një person saudit mund të dëgjohet duke abuzuar verbalisht me mjekun, duke e quajtur atë “skllav i zi” dhe një “kafshë e ndyrë”.

Në deklaratën e tyre për këtë çështje, Ministria e Shëndetësisë së Arabisë Saudite tha se autoritetet kanë identifikuar personin racist dhe se ai do të ndiqet penalisht. Zyrtarët shtuan se ai i cili regjistroi dhe shpërndau audion do të identifikohet shpejt dhe gjithashtu do të ndiqet penalisht.

Pak orë pasi audio u bë virale, ministri i Shëndetësisë, Dr. Tawfiq Al Rabia lëshoi ​​një deklaratë përmes së cilës falënderoi mjekun e spitalit për bindjen e tij ndaj zbatimit të rregullave të punës. Al Rabia gjithashtu shtoi se sulmet e kësaj natyre nuk do të tolerohen kurrë nga askush në Mbretërinë Saudite.

Audioja ofenduese ka zemëruar jo vetëm autoritetet në mbretëri, por ka shkaktuar zemërim edhe në mesin e njerëzve në mediat sociale. Sapo audio e regjistruar filloi të bëjë xhiron në internet, mijëra shfrytëzuan Twitter-in, nëpërmjet hashtag-ut tani viral: “Një njeri racist sulmon një mjek”.

Menjëherë pasi ministri Al Rabia lëshoi ​​një deklaratë që dënonte sulmin racist, ai gjithashtu u takua me mjekun sudanez në zyrën e tij, duke përsëritur qëndrimin e tij lidhur me këtë çështje.

Në një video që tani po qarkullon në mediat sociale, Al Rabia shihet duke lavdëruar mjekun për mënyrën se si menaxhoi gjithë situatën, duke premtuar se do të ndërmerret një veprim i duhur kundër njeriut që e ka ofenduar. /tesheshi.com/