Një pjesë e një raporti të Fredoom House kushtuar Shqipërisë, ka indinjuar kreun e shtetit Ilir Meta. Fjala është për atë frazë ku thuhet se “arritjet në luftën kundër korrupsionit u zbehën nga zgjedhja si president i Ilir Metës, i cili shihet nga shumë qytetarë si simbol i korrupsionit”.
“Keqardhje për keqpërdorimin e këtij raporti të Freedom House në funksion të axhendave të njëanshme politike në vendin tone”, thuhet në një reagim të zëdhënësit të Presidencës, Tedi Blushi.
“Zgjedhja e Presidentit Meta është realizuar në një proces tërësisht kushtetues dhe demokratik me një shumicë mbi 3/5-at të votave dhe në një moment kyç për stabilitetin e vendit dhe zgjidhjen e krizës politike parazgjedhore.
Në mënyrë të sforcuar dhe të njëanshme ky raport, jo vetëm deformon këto të vërteta, por në mënyrë spekulative dhe të qëllimshme kërkon të krijojë fokuse artificiale.
Në se Freedom House është i interesuar vërtet të hedhë dritë mbi korrupsionin në Shqipëri, duhet të hetojë në mënyrë të paanshme kush ka ndikuar dhe porositur këto deformime të fakteve dhe të të vërtetave në këtë raport dhe jemi të bindur se aty do të zbulojë simbolet konkrete të korrupsionit kombëtar dhe ndërkombëtar.
Për këtë qëllim jemi të hapur të bashkëpunojmë edhe me Freedom House“, thuhet në reagim.
Është ky ndër të rrallat raste kur një raport ndërkombëtar kundërshtohet fuqishëm nga zëra të politikës në Shqipëri. Herë të tjera, thjesht janë interpretuar duke luajtur në kontekstin. /tesheshi.com/
