Nga Mensur Krasniqi
Në momente kur të gjithë shqiptarët po edhe futbolldashësit në Maqedoni pa dallim duhej t’i gëzoheshin fitores historike të Shkëndijës së Tetovës kundër ekipit çek, Mllada Bolesllavit në kuadër të kualifikimeve për fazën e grupeve në Ligën Evropa, kjo ndeshje pas përfundimit të saj ka marrë përmasa etnike dhe është shoqëruar me komente nacionaliste.
Ishte komentatori i SuperSport dhe Digitalb nga Shqipëria, Dritan Shakohoxha ai i cili duke komentuar ndeshjen drejtpërdrejt nga stadiumi në Shkup, e pagëzoi me emrin e heroit kombëtar të UÇK-së, Adem Jashari stadiumin kryesor në të cilin po e zhvillonte ndeshjen Shkëndija në ato momente.
Kjo dëshirë nacionaliste e Shakohoxhës për tа quajtur “Adem Jashari” dhe jo “Filipi i dytë”, ashtu siç njihet zyrtarisht nga Federata e Futbollit Maqedonas, FIFA dhe UEFA, ka revoltuar tejmase maqedonasit.
Përveç komenteve fyese ndërmjet maqedonasve dhe shqiptarëve nëpër rrjetet sociale, gazetari i televizionit ultra-nacionalist dhe pro-qeveritar Tv Sitel, Igor Trpeski, pas këtij “gafi” të Shakohoxhës ka kërkuar që i njëjti të shpallet ”Persona non grata”, ndërsa SuperSport-it t’i ndalohet transmetimi në Maqedoni.
”Shkruaj shkurt dhe dua të jem i qartë. Nga sot unë nuk do të publikoj lajme për KF Shkëndija nësë shefi apo presidenti i Shkëndijës nuk distancohet nga komentatori që arenën ”Filip Vtori” e quajti ”Adem Jashari”. Ju bëj thirrje edhe kolegëve të mij gazetar që të bëjnë të njejtën gjë. Gjithashtu bëj thirrje edhe tek Federata e Futbollit të Maqedonisë që të ndaloj transmetimin e platformës SuperSport në Maqedoni për lojën Shqipëri-Maqedoni në suaza të kualifikimeve për Kampionatin Botëror. Ndërmarrjes për menaxhim me stadiumin i bëj thirrje që të mos lejoj Shkëndijën të luaj në këtë stadium. Boll me nacionalizëm në terrenet sportive.” shkruan Trpeski me shumë mllef e nervozë.
Përveç grupit të tifozëve “Ballistët” dhe disa të tjerë, pjesa dërmuese e shqiptarëve në Maqedoni janë distancuar nga “bërja qejf vetes” siç thonë ata nëpër statuset e tyre në facebook. Sipas një qytetari aktiv nga Shkupi, akti i Shakohoxhës për t’ia ndryshuar emrin stadionit kryesor, jep pasqyrë të rrejshme për gjendjen e shqiptarëve në Maqedoni. Kështu sipas tij bashkëkombasit tanë në Shqipëri mendojnë se shqiptarët e Maqedonisë i kanë pru punët në “terrezi” sakaq edhe stadiumin kryesor e kanë të vetin.
Nga ana tjetër, edhe e përditshmja sportive Maqedonase, “Makedonski Sport” e ka quajtur këtë rast si provokim nga gazetari Dritan Shakohoxha.
“Pffff “luks” totalisht i panevojshëm!! Bile bile edhe në dëmin tonë! Paramendo tash ata njerzt n’Shqipri thonë: ejjj po mir i paskan punët atje edhe stadium paskan me emrin e Adem Jashar-it!! Oooo ky “patriotizëm” i budallakinave na ka qu shumë pas neve po shëndosh”, ka shkruar Bekim Berisha nga Shkupi.
Ndryshe, portali tesheshi.com mëson se Shakohoxha ka marrë sugjerime dhe lutje nga tifo grupi i Shkëndisë “ballistët” për ta quajtur stadiumin ”Adem Jashari”. /tesheshi.com/
