Suedia, vendi i Ikea-s dhe i mirëqenies sociale ka diçka për t’i thënë botës: një lajm që mund të trondisë krejt oazin e shijes. Qoftet suedeze, ushqimi karakteristik kombëtar, janë me të vërtetë turke!
Llogaria kombëtare e Suedisë në Twitter e bëri publik një fakt të tillë në një postim të saj këtë javë.
“Qoftet suedeze e kanë origjinën në një recetë që Mbreti Karl XII pati sjellë nga Turqia në fillim të shekullit të 18-të”, thuhet në postim. “Le ta pranojmë këtë fakt!”
Nuk dihet me siguri se pse Suedia vendosi ta bënte pikërisht në këtë kohë këtë korrigjim faktesh, por ky pohim shkaktoi një furtunë të madhe reagimesh.
Turqit u ngazëllyen, ndërsa një pjesë e suedezëve u trazuan.
“E gjithë jeta ime paska qenë gënjeshtër!” – u shpreh me keqardhje një suedez në Twitter. Nga ana tjetër, disa komentues turq i sugjeruan Suedisë që ta ndryshonte emrin e qofteve të saj e t’u vinte emërtimin turk “kofte”.
Mediat turke e cilësuan si një “rrëfim” postimin suedez në Twitter dhe shtuan se Karli, i cili sundoi gjatë viteve 1697-1718 dhe jetoi për disa vjet si i dëbuar në Perandorinë Osmane, në fillimet e shekullit të 18-të, pati çuar në Suedi edhe disa produkte të tjera turke, ndër të cilat: kafenë dhe lakrën.
Me sa duket, në përpjekje për të shmangur një “luftë kulinare”, llogaria kombëtare e Suedisë në Twitter iu përgjigj këtyre deklaratave në mënyrë asnjanëse duke thënë:
“Ne e duam kafenë edhe më shumë sesa qoftet! Madje, këtu në Suedi e kemi pasur edhe të ndaluar atë për ca kohë!”
Veç të tjerash, deklarata mbi origjinën e qofteve u shfrytëzua edhe si një mundësi nga ana e suedezëve, për të nxjerrë në pah disa prej shpikjeve të këtij vendi. /tesheshi.com/
