Një projekt i menduar që në fillim të viteve ’90 të shekullit të kaluar u finalizua dje, duke i dhënë fund mungesës së ujit në Qipron turke. Tubacioni i shtënë nën det e përcjell tashmë ujin nga brigjet turke në ato të Qipros veriore.
Ky tubacion i gjatë 80 kilometra, e në një thellësi 250 metra, ka për të mbartur 75 milionë metra kub ujë
për çdo vit, duke i përmbushur kështu nevojat e popullsisë vendase. Gjysma e sasisë së ujit do të përdoret si ujë i pijshëm, e gjysma për vaditje.
Tubacioni ka ndijues dhe transmetues që sinjalizojnë çdo defekt të mundshëm.
Për ndërtimin e tubacionit që gjatësinë e përgjithshme e ka 107 kilometra u shpenzuan rreth 1.6 miliardë lira turke, apo ndryshe, 576.3 milionë dollarë.
Uji i siguruar nga Turqia do t’i përmbushë për 50 vite nevojat e qipriotëve turq, si dhe do të ndihmojë në ndryshimin e përparësive të ekonomisë së vendit, të përqendruar deri tani vetëm te turizmi. /tesheshi.com/
