Shirat e rrëmbyeshëm në jugperëndim të Kolumbisë kanë sjellë tragjedi; rrëshqitjet e tokës, balta e gurët kanë mbuluar lagje të tëra në Mokoa, një qytet në këtë pjesë të vendit.
Më së paku janë 254 viktima nga katastrofa, ndërkohë që forcat e sigurisë po kërkojnë qindra të tjerë të humbur.
Rreth 1.100 forca ushtarake dhe policore gjenden të përfshira në operacionet e shpëtimit. Një njoftim i ushtrisë kolumbiane flet për 400 të lënduar dhe për 200 të tjerë të humbur në kryeqendrën e provincës së Putumajos.
Në rajonin e goditur nga përmbytjet dhe rrëshqitjet e dheut është shpallur gjendje e jashtëzakonshme.
“Do të bëjmë ç’është e mundur për të ndihmuar,” raporton BBC-ja të ketë thënë presidenti kolumbian Juan Manuel Santos.
Gjatë muajve të fundit ka patur një varg rrëshqitjesh toke në Kolumbi, siç ishte një e tillë tetorin e shkuar në veri të vendit, që u mori jetën dhjetë personave. /tesheshi.com/
