Gjashtë muaj pasi një tërmet i fuqishëm shkatërroi pjesë të tëra të Nepalit, dje janë lëkundur fort Pakistani e Afganistani.
Tërmeti 7.5 ballësh u ka marrë jetën 335 personave e ka lënduar 2000 të tjerë, por ky numër pritet të rritet me kalimin e orëve. Më së paku 253 njerëz humbën jetën në Pakistan, e 82 në Afganistan.
Banesa të tëra janë shkatërruar, ndërsa mijëra banorë e kaluan jashtë natën e ftohtë të së hënës, nga frika e tërmeteve të tjera pasuese.
Navaz Sherif, kryeministri pakistanez, ndërpreu vizitën në Mbretërinë e Bashkuar, duke u kthyer menjëherë në vend. “Do të bëjmë më të mirën për t’i bërë ballë kësaj katastrofe, duke përdorur burimet tona,” deklaroi ai.
Në Afganistan, presidenti i vendit, Eshref Gani, u bëri thirrje qytetarëve t’i ndihmojnë ata në nevojë, “U kërkoj të gjithë afganëve ta ndihmojnë njëri-tjetrin nëse janë në zonat e prekura.”
Ndërkohë vazhdojnë operacionet e shpëtimit, si dhe ato të ndihmës për banorët e mbetur pa strehë. /tesheshi.com/
