Mensur Krasniqi
Disa qindra banorë të Tetovës nën iniciativën e organizatës joqeveritare “Eco Guerilla” kanë protestuar kundër komunës, e cila ka lënë pas dore vendngrumbullimin e mbeturinave, i cili në vend që të pastrohet, është djegur.
Protesta filloi nga ky vend për të përfunduar te Komuna e këtij qyteti.
Kreu i “Eco Guerillës”, Arianit Xhaferi në fjalimin e tij para protestuesve bëri thirrje që rasti i djegies së mbeturinave të mos marrë përmasa politike dhe shkaktarët e saj të përgjigjen në bazë të dispozitës së parashtruar në Kodin Penal.
“Të nxirren zjarrvënësit para ligjit. Kërkojmë nga pushteti qendror që të kontrollojë pushtetin lokal qoftë atë të mëparshëm dhe atë aktual për të gjitha hapat që janë ndërmarrë në lidhje me vendgrumbullimin e mbeturinave në Tetovë. Ne nuk do të ndalemi me reagime, sepse nuk ndalemi së marri frymë. Nga këtu do të shkojmë drejt objektit të Tetovës duke bërë thirrje që të zbatohet Kodi Penal ku parashihet burg për kryerësit e veprës penale”, tha Xhaferi gjatë protestës.
Ky aksion është ndërmarrë në të njëjtën kohë me fillimin e pastrimit të mbeturinave nga ana e Komunës.
Kryetarja e Komunës së Tetovës, Teuta Arifi, deklaroi se pastrimi që ka nisur sot është rezultat i një angazhimi afatgjatë të zyrtarëve komunalë në bashkëpunim me ata qeveritarë.
“Pastrimi është në kordinim të plotë me planin për realizimin e punimeve të Komunës së Tetovës, i cili është një rezultat i një angazhimi permanent i Organeve Komunale për të gjetur zgjidhje afatgjatë me menaxhimin e mbeturinave.
Mbeturinat komunale do të transferohen në vendgrumbullime rajonale dhe në bazë të vlerësimeve bëhet fjalë për 30.000 deri 40.000 m3 mbeturina komunale dhe inerte.
Procesi i pastrimit të tërësishëm të këtij lokaliteti si dhe rafinimi me truall të mirë dhe kualitativ pritet të mbarojë në afatin kohor prej 3 deri 4 javë”, deklaroi Tetuta Arifi, kryetare e komunës së Tetovës.
Teuta Arifi si kandidate për kryetare e komunës së Tetovës në zgjedhjet e fundit lokale si kryefjalë të fushatës kishte problemin me mbeturinat, por sot e 4 vite ky problem ende nuk është zgjidhur./tesheshi.com/
