Stërvitja e fundit jrore në aeroportin e Shkupit, e cila përfshinte avionë të NATO-s Avax, avionë luftarakë grekë F-16 dhe Learjet në pronësi të shtetit, shënoi përfshirjen e hapësirës ajrore të Maqedonisë së Veriut në sistemin e patrullimit ajror të Aleancës.
Në këtë aktivitet morën pjesë një numër i madh zyrtarësh nga Maqedonia e Veriut, përfaqësues të NATO-s dhe të tjerë.
“NATO mbron, NATO bashkohet dhe NATO forcohet”, tha ministrja e Mbrojtjes e Maqedonisë së Veriut, Radmila Shekerinska, duke theksuar se sot kanë pasur rastin të shohin se si këto tre synime dhe detyra të Aleancës shpalosen realisht para syve të tyre.
Ajo tha gjithashtu se të gjithë kanë pasur mundësinë të shohin se si Maqedonia e Veriut, si anëtarja e 30-të e aleancës më të fuqishme ushtarako-politike, është më e fortë dhe më e mbrojtur nga anëtarësimi në NATO.
“Me këtë ngjarje, këtu në aeroportin në Petrovac, mund të shohim se si duket misioni i patrullimit ajror të NATO-s mbi qiellin mbi Maqedoninë e Veriut, në mënyrë që hapësira jonë ajrore të integrohet plotësisht në sistemin e patrullimit ajror të NATO-s. Nga sot mund të themi se siguria e qiellit tonë është pjesë e sigurisë së NATO-s”, tha Shekerinska.
Komandanti i Qendrës së NATO-s për Operacionet e Kombinuara Ajrore në Torrejón, gjeneralkoloneli Fernando De La Cruz Caravaka, theksoi se Maqedonia e Veriut duhet të jetë krenare për bashkëpunimin me vendet e tjera të NATO-s.
Sipas tij, Maqedonia e Veriut promovon stabilitetin dhe sigurinë në rajon.
“Që nga viti 2020, kur Maqedonia e Veriut u anëtarësua zyrtarisht në NATO, ju keni qenë në gjendje të përshtateni me Aleancën, duke përfshirë një sërë procedurash të reja. Dhe tani ju keni arritur rezultate. Ju duhet të jeni krenarë për punën tuaj. Jam i bindur se do të ruani të njëjtin nivel suksesi për të mirën e të gjithë popujve tanë”, tha De La Cruz Caravaca.
Sipas qeverisë së Maqedonisë së Veriut, patrulla ajrore e NATO-s është një pjesë kyçe e mbrojtjes kolektive, e cila shërben si shtyllë e Aleancës dhe siguron të njëjtin standard sigurie për secilin nga shtetet anëtare.
Ky mision nuk është i fokusuar në një kërcënim specifik, por është një nga mjetet bazë për ruajtjen e sigurisë së NATO-s.
Nëpërmjet mbikëqyrjes së vazhdueshme ajrore dhe patrullimeve, avionët e NATO-s mund t’i përgjigjen çdo lloj pasigurie në qiellin e Aleancës në vetëm disa minuta. /tesheshi.com/
