Ministrja e Mbrojtjes Olta Xhaçka tha nga Kakavija se po bëhen të gjitha përpjekjet, si në terren me njerëzit për t’u ofruar ndihmë në radhën e gjatë të pritjes për kalim në tokën greke, e si në bisedë me autoritetet e Athinës për të lehtësuar sadopak vuajtjen e qindra njerëzve.
“Po bëjmë shumëçka që të gjithë qytetarëve të mos u mungojnë nevojat bazike. Jemi koordinuar me Ministrinë e Shëndetësisë për të sjellë mjekë dhe ambulanca për qytetarët që kanë nevojë dhe për të marrë masat për të krijuar kushtet higjieno-sanitare për të mos rrezikuar më shumë në kohë pandemie.
Me Ministrinë e Infrastrukturës kemi sjellë tualete të lëvizshme për t’u ardhur në ndihëm qytetarëve dhe bashkë me bashkitë e Dropullit dhe Gjirokastrës po koordinojmë pajisjen me ushqim të të gjitha familjeve që janë në pritje.
Ministria e Jashtme është duke komunikuar intensivisht me palën greke, për të bërë të mundur rritjen e testimeve deri në 330 tamponë për orë, por me perspektivën për t’i shtuar edhe më këto kapacitete.
Jemi në bisedime intensive që orari i punës në pikën kufitare të zgjatet përtej orës 22:00 dhe puna të vijojë edhe natën”, tha Xhaçka.
Sipas saj, kjo që ndodh në Kakavijë, ndodh dhe në shumë pika të tjera doganore në Europë apo gjetkë në këto kohë krize pandemike.
“Është një situatë që për fat të keq që janë përballur jo vetëm vende jashtë BE por dhe vende të BE. Kjo është krijuar nga vështirësitë e pandemisë dhe po punojmë intensivisht që kjo situatë të zgjidhet një orë e më parë. Zgjatja e orarit dhe rritja e intensitetit të punës janë ende tema që po diskutohen intensivisht”, tha Xhaçka.
Nga ana tjetër, nga Ministria e Jashtme u tha se presioni i Tiranës mbi Athinën ka dhënë rezultat.
“Nga ora 14-18 kanë kaluar mbi 1300 persona”, thuhet në një deklaratë të saj. /tesheshi.com/
