Qeveria shqiptare ka vijuar të mos pranojë “lajmin” denoncues të Zërit të Amerikës lidhur me punësimet pa konkurs në administratë, referuar dosjes së ish-kreut të Burgjeve Arben Çuko, ku sipas përgjimeve ky sektor punësonte militant me urdhër nga lart.
Është ministrja e Drejtësisë Etilda Gjonaj ajo që mbron qeverinë në këtë rast.
“Është çështje shumë e rëndësishme dhe jam e vendosur ta mbroj deri në fund me përgjegjësi maksimale, sepse besoj se ka qenë procesi më meritokratik, transparent dhe cilësor në historinë e sistemit penitenciar”, deklaroi ministrja Gjonaj, duke vijuar me argumentat e saj.
“VOA nuk mori në konsideratë qëndrimin e Ministrisë së Drejtësisë dhe as argumentet që unë prezantova lidhur me këtë proces, por rikonfirmoi qasjen totalisht të gabuar lidhur me të dhënat e dosjes hetimore. U shpreh për prova që gjendeshin në dosjen hetimore, pa marrë parasysh se ato prova janë indicie, që do t’i japin mundësinë Prokurorisë për të hetuar më tej lidhur me çfarë kanë dalë nga përgjimet. Besoj se do të ishte korrekte, që Zëri i Amerikës, në bazë të këtyre indicieve të kërkonte të verifikonte dosjen e procedurave të testimit të punonjësve të policisë së burgjeve, për të parë nëse interesimi legjitim i deputetëve për çështje të caktuara të personelit është përkthyer apo jo në mënyrë apo në shkelje të të drejtave të atyre që kanë marrë pjesë në testim dhe që u takonte vendi sipas ligjit dhe meritës së tyre”.
Një ditë më parë, po pas një qëndrimi të ministres Gjonaj, VOA u mbrojt duke thënë se përgjimet ishin të qarta. /tesheshi.com/
