Kryeministria njoftoi paraditen e së hënës se sulmi kibernetik që ka prekur platformat qeveritare ka nisur që të premten në mesditë, por falë izolimit të infrastrukturës dhe sistemeve është bërë e mundur që të garantohet mbrojtja e të dhënave.
“Fatmirësisht, detektimi dhe përgjigjja e shpejtë ndaj këtyre sulmeve bëri që sistemet qeveritare të dalin të paprekura. Që në momentet e para të evidentimit të këtij sulmi, AKSHI është duke bashkëpunuar ngushtësisht me partnerët tanë të Microsoft, nëpërmjet ekspertëve të tyre më të mirë kibernetikë të Detektimit dhe Përgjigjes ndaj Incidenteve (DART team). Gjithashtu, ekspertët e ‘Jones Group International” janë këtu, për trajtimin e situatës dhe kthimin sa më shpejt në normalitet”, thuhet në deklaratë.
Përmes një njoftimi zyrtar, qeveria shpjegon se të dhënat janë të sigurta dhe sistemet të paprekura, pasi të gjitha kanë sistem “back-up”:
“Sistemet qeveritare kanë të gjitha “back-up” dhe janë të sigurta. Në këtë moment jemi duke verifikuar sistem pas sistemi që këto të fundit të jenë të sigurt në çdo element, përpara se të kthehen sërish “online” dhe në funksionalitet të plotë. Paralelisht, të gjithë aktorët institucionalë janë në gatishmëri të plotë dhe në komunikim të vazhdueshëm për hetim të thellë e të detajuar të këtij krimi kibernetik. Sigurojmë të gjithë qytetarët se të dhënat e sistemeve të informacionit të shërbimeve qeveritare janë të sigurta dhe të paprekura”, sqarohet nga selia qeveritare shqiptare.
Autoritetet shpjegojnë se modalitetet e këtij sulmi janë të ngjashme me ato të vëna re në shumë vende të tjera gjatë kohëve të fundit: “Metodat mbi të cilat aktorët keqbërës kanë vepruar janë të ngjashme me sulmet e vitit të fundit, të vëna re në hapësirën kibernetike ndërkombëtare. Teknikat mbi të cilat ky sulm mbështetet janë të së njëjtës natyrë me ato të përdorura për një sërë sulmesh kibernetike në ‘domain’-et qeveritare dhe private të kohëve të fundit, si në Ukrainë, Gjermani, Lituani, Maltë, Holandë, Belgjikë dhe vende të tjera të rajonit. Vetëm në Ukrainë këtë vit ka pasur 5 sulme me të njëjtën metodologji, ndërsa në Gjermani i njëjti lloj sulmi ka nxjerrë jashtë funksioni impiantet e prodhimit të energjisë me erë”.
Qeveria mbyll njoftimin duke bërë thirrje që të shmangen polemikat politike, për sa kohë thotë se gjendemi përballë një armiku të përbashkët në një luftë kibernetike. /tesheshi.com/
