Një shkrim me nota pozitive në të përditshmen “The Independent” për atmosferën harmonike që ekziston në Kosovë ka shqetësuar zyrtarët e Beogradit, aq sa të kërkojnë të censurojnë edhe median britanike. Drejtori i zyrës për Kosovën në qeverinë e Beogradit, Marko Gjuriç, me anë të një letre drejtuar redaksisë, i ka tërhequr vërejtje gazetës se shkrimi “bie ndesh aq shumë me realitetin”, sa Beogradi nuk mund të mos reagojë.
Gazeta botoi ditën e hënë një ditar udhëtimi nga Peter Duncan me titullin “Kosovo: Harmony prevails in this corner of the Balkans“ (Kosova: Harmonia mbretëron në këtë cep të Ballkanit).
Por, përkundër asaj që përshkruan autori, Gjuriç mendon se “është hipokrizi të thuhet se në Kosovë ka harmoni ndërmjet komuniteteve, pasi 200 mijë serbë të dëbuar nga Kosova nuk mund të kthehen ende në shtëpitë e tyre”.
“Jemi të vetëdijshëm për faktin se nuk mund të pajtohemi lidhur me këtë çështje, siç nuk pajtohemi për të njëjtën çështjes as me qeverinë e Londrës”, citohet të ketë shkruar Gjuriq nga agjencia serbe e lajmeve, Tanjug. /tesheshi.com/
