Qeveria “Rama2” ka nisur zyrtarisht funksionimin pas betimit te Presidenti i Republikës.
Tashmë ministrat e rinj po marrin detyrat, ndërsa duket se është vendosur një traditë për dorëzimin e saj nga parardhësit.
Kështu Lefter Koka i ka dorëzuar detyrën Blendi Klosit, që do të drejtojë Ministrinë e Turizmit dhe Mjedisit.
Në ceremoni ishin të pranishëm i gjithë stafi i punonjësve të ministrisë si dhe përfaqësues të institucioneve të varësisë.
Koka falenderoi ekipin për bashkëpunimin në arritjen e objektivave dhe sfidave dhe uroi Klosin për detyrën me bindjen se puna e nisur do të çohet në një standard më të lartë nga një politikan me përvojë e me eksperiencë institucionale.
Nga ana e tij, Klosi theksoi rëndësinë që turizmi merr në këtë ministri si një sfidë që ka nevojë për përkushtim dhe profesionalizëm. Ai theksoi se drejtimi i këtij dikasteri është një përgjegjësi e madhe dhe synon që ta bëjë Shqipërinë një destinacion konkurrues turistik në nivel global.
Ministri Klosi siguroi se do t’i japë një zhvillim të ri, reformave të ndërmarra dhe atyre që pritet të realizohen me qëllim përshpejtimin e përafrimit të standardeve kombëtare me ato të Bashkimit Europian. /tesheshi.com/
