Kryeministri Edi Rama deklaroi gjatë takimit me ambasadorët se qeveria e re do të bëhet e ditur më 27 gusht, ditë kur Partia Socialiste do të mbledhë Asamblenë Kombëtare.
Por duket se në media qarkullojnë detaje mbi kabinetin qeveritar “Rama2”, të cilat përfshijnë jo vetëm ndryshimet strukturore, por edhe disa nga emrat e ministrave.
Kështu, sipas Tv klan, pritet që Mimi Kodheli të lërë drejtimin e Ministrisë së Mbrojtjes, për të marrë kryesimin e komisionit të Jashtëm të Parlamentit, detyrë që sesionin e kaluar mbahej nga ish-deputetja socialiste, Arta Dade.
Një tjetër lëvizje është ajo e numrit 2 të qeverisë Niko Peleshi, të cilit do t’i besohet Ministria e Mbrojtjes. Ndërkohë, që pozicionin e zv.kryeministrit, Rama pritet t´ia besojë një gruaje.
Ditët e fundit mediat kanë raportuar disa variante për postet ministrore, por ajo që të paktën është deklaruar publikisht nga Rama, është se Fatmir Xhafaj do të marrë detyrën e ministrit të Brendshëm, duke iu rikthyer drejtimit të dikasterit që e morri pak muaj para zgjedhjeve por u largua, pas marrëveshjes mes kryeministrit dhe kreut të opozitës.
Po kështu, ajo që dihet dhe është pohuar nga kreu socialist është që Gramoz Ruçi do të jetë në krye të Kuvendit të Shqipërisë. /tesheshi.com/
