Rruga e Kombit nuk do të bëhet me pagasë, siç është parathënë prej kohës. Burime të tesheshi.com nga qeveria bëjnë të ditur se shumë shpejt do të shpallet nga ministria e Transporteve dështimi i tenderit për konçensionin e tunelit të Thirrës.
Por jo vetëm kaq, pra nuk është fjala thjesht për një anulim tenderi, sepse bëhet fjalë për ta lënë situatën kështu siç është, pa asnjë lloj pagese.
Gara
Në garën për koncension paraqitën ofertat dy kompani, “China Construction Commucination Company” L.T.D dhe “Vendeka Bilgi Teknolojileri Ticaret L.T.D & Salillari”.
Ndërsa dy kompanitë e tjera, konsorciumi “Aktor Concessions S.A Egis Projects” dhe kompania “Geg Terna-Terna S.A” nuk paraqitën ofertat.
Konçesionari do të duhej të ndërtonte urën e re të Kukësit, si dhe të rehabilitonte skarpatet gjatë gjithë gjatësisë së rrugës, tunelin në dalje të urës së Kukësit dhe disa elementë të rrugës, përfshirë sinjalistikën dhe ndriçimin e kryqëzimeve.
Masat populiste
Tërheqja nga koncensioni i mirëmbajtjes së rrugës Durrës-Kukës duket se përbën një masë tjetër populiste të Ramës, pas asaj të zerimit të biznesit të vogël, që në mënyrë të beftë kanë tronditur sadopak opinionin publik, për mirë, kuptohet. Por analistë të shumtë nuk kanë përjashtuar mundësitë se mund të jetë një manovër elektorale në rast prishjeje me Ilir Metën dhe dalje në zgjedhje të parakohshme.
Dyshimet janë shtuar edhe më shumë pas një interviste të këshilltarit të Ramës, Fate Velaj. Për gazetën “Dita”, ai ka deklaruar se “Qeveria ka ndërmarrë disa reforma të cilat kanë pasur kosto si për popullatën, ashtu dhe vetë atë. Nëse do që këto reforma të vazhdojnë, duhet t’i lënë hamendësirat nëse ia vlen apo jo qëndrimi bashkë. Nëse jo, atëherë duhet tëshpallin zgjedhjet e parakohshme”,
/tesheshi.com/
