Ministrja e Drejtësisë Etilda Gjonaj kërkoi hetim ndaj atyre gjyqtarëve apo prokurorëve të larguar nga sistemi.
Duke ofruar rekomandimet e qeverisë për luftën kundër kriminalitet për vitin 2021, si ndër më kyçet theksoi pikërisht këtë.
“Duhet hetimi i gjyqtarëve që janë larguar nga sistemi, qoftë me dorëheqje dhe shkarkim.
Pritshmëritë e publikut janë që gjyqtarët që janë pasuruar në kurriz të fatkeqësive, të dalin para drejtësisë.
Kjo ka qenë në vijimësi kërkesë e ndërkombëtarëve, ti vendoset vëmendje nga SPAK dhe GJKKO”, theksoi Gjonaj.
Nga ana tjetër, ajo tha se Reformë në Drejtësi u jepte mundësi shumë gjykatësve dhe prokurorëve për të qenë të pavarur, sidomos këtyre të dytëve sipas saj, duke veçuar dhe trajtimin më të mirë financiar.
“Reforma në drejtësi solli ndryshime të thella ligjore me qëllim ndërtimin e një sistemi drejtësisë të pavarur dhe të përgjegjshëm.
Sot është ndryshuar rrënjësisht struktura e drejtësisë, duke synuar si garantimin e pavarësisë së jashtme dhe brendshme të prokurorëve. Prokurorëve iu është dhënë fuqia për të qenë të pavarur jashtë ndikimit të Prokurorit të Përgjithshëm apo Prokurorisë, pa qenë të ndikuar nga politika. Jam e bindur se radha për të treguar përgjegjësinë është te Prokuroria”, tha Gjonaj. /tesheshi.com/
