Nga Blendi Gashi
Përveç pasurive të paluajtshme e rrogave të majme, zyrtarët e partive, që u bënë pjesë e kabinetit qeveritar “Haradinaj”, gjatë këtij viti në Agjencinë Kundër Korrupsion kanë deklaruar edhe vetura të shtrenjta e shuma marramendëse të ruajtura në banka.
Nga deklarimi i bërë shihet se duke filluar nga kryeministri, zv.kryeministrat e ministrat të gjithë në vitet e fundit, si pjesë e politikës, duke mbajtur poste të ndryshme shtetërore kanë krijuar pasuri marramendëse, por mbetet të shihet nëse do i shtojnë ato vitin e ardhshëm kur shumica e tyre tashmë mbajnë poste të rëndësishme.
Megjithatë në këtë shkrim do të pasqyrojmë vetëm deklarimet e bëra në mars të këtij viti nga ministrat ndërsa ata mbanin poste të tjerë në shtet. Pra saktësisht do tregojmë se sa para kanë të ruajtura në banka dhe ç’farë vetura zotërojnë.
Kryeministri e zv.kryeminsitrat…
Kryeministri Ramush Haradinaj, i cili qëndroi për më tepër se dhjetë vite nuk ka deklaruar të ketë para të kursyera në deklarimin e bërë në mars të këtij viti si deputet.
Ai ndërkaq ka deklaruar një veturë në vlerë 8 mijë euro në emër të bashkëshortes, të blerë në vitin 2013.
Enver Hoxhaj, zv.kryeministër, në mars të këtij viti sa ushtronte pozitën e ministrit të Punëve të Jashtme ka deklaruar një llogari bankare në vlerën e 121575 euro. Ndërsa ka deklaruar veturë të tipit Audi në vlerë 10 mijë euro
Fatmir Limaj zv.kryeministër ka para më shumë se Haradinaj të depozituara në bankë e shumë më pak se Hoxhaj. Saktësisht 20581 euro, ndërsa ka shkruar se nuk posedon veturë.
Zv. kryeminsitri nga radhët e serbëve Dalibor Jevtiç, njëherësh ministër për Komunitete dhe Kthim sipas deklarimit qëndron më mirë se dy të parë.
Ai ka në bankë saktësisht 40 mijë euro. Jevtiç ka deklaruar veturë të tipit Passat në vlerë 30 mijë eruro në emer personal dhe një veturë tjetër të tipit Smart në vlerë 5 mijë euro në emër të bashkëshortës
Duhet theksuar se zv.kryeministri tjetër Behgjet Pacolli, njëherësh ministër i Jashtëm në këtë vit nuk ka deklaruar pasuri pasi nuk ka qenë pjesë e institucioneve. Ndërsa në vitin 2014, ka deklaruar pasuri marramendëse pasi edhe njihet si ndër shqiptarët më të pasur.
Veturat e ministrave dhe paratë e ruajtura në banka…
Bedri Hamza, ministër i Financave, gjatë kohës si drejtor i Bankës Qendrore ka deklaruar në emër të tij llogari në vlerën e 3559 euro kurse në emër të bashkëshortes 362 euro.
Ai ka deklaruar se posedon tre vetura. Mercedes, në emër të tij, në vlerën e 7 mijë euro, në emër të bashkëshortes Renault në vlerë 13 mijë euro, kurse në emër të fëmijëve BMË në vlerë 5 mijë euro.
Pal Lekaj, ministër i Infrastrukturës gjatë deklarimit të pasurisë si deputet këtë vit ka deklaruar dy vetura të tipit Mercedes ,njërën me vlerë 22 mijë euro dhe tjetrën në vlerë 15 mijë euro. Ndërkaq nuk ka deklaruar llogari bankare.
Rrustem Berisha, ministër i Infrastrukturës, në deklarimin e pasurisë për 2017, në kohën si deputet ka deklaruar një veturë të tipit Tauran në emër të bashkëshortes në vlerë 7500 euro.
Kurse para të depozituara në bankë ka deklaruar mbi 1 mijë euro, në emër të tij dhe bashkëshortes.
Abelard Tahiri, ministër i Drejtësisë në deklarimin e bërë si pjesë e stafit të presidentit Thaçi ka deklaruar llogari në bankë në vlerën e 1700 euro, ndërsa nuk poseidon veturë.
Dhurata Hoxhaj, ministre e Integrimeve Evropiane, në kohën si ministre e Drejtësisë, ka deklaruar në emër të saj një llogari me 2 mijë euro, kurse 33 mijë në emër të bashkëshortit.
Ka deklaruar se posedon veturë të tipit Dacia Duster në vlerë 16.900 euro
Uran Ismajli, ministër i Shëndetësisë, në kohën sa ka ushtruar detyrën e shefit të kabinetit të kryekuvendarit Veseli, ka deklaruar llogari në vlerën e 2143 euro, ndërsa ka thënë se nuk posedon veturë.
Besim Beqaj, ministër i Inovacionit, si deputet në mars të 2017-tës ka deklaruar se në emër personal ka të ruajtura në bankë 57 900 euro, 116 mijë të tjera në emër të përbashket, 21.800 në emër të fëmijeve , 22 mijë euro në emër të prindërve dhe 63000 në emër të bashkëshortes.
Ka deklaruar se posedon veturë të tipit Mercedes ML në vlerë 25 mije euro (ndërrim me E270 dhe kredi) dhe një veturë tjetër të tipit Ëolsfagen në vlerë 12 500 euro në emër të bashkëshortes.
Bajram Hasani, ministër i Tregtisë dhe Industrisë sivjet në kohën sa ishte këshilltar komunal në Gjilan ka deklaruar saktësisht 30 mijë euro. Gjithashtu ka deklaruar tre vetura, një të tipit Range Rover në vlerë 30 mijë euro, një të tipit Tiguan në emër të prindërve në vlerë 33 mijë euro, dhe veturë golf në vlerë 12 mijë euro në emër të gruas.
Kujtim Gashi, ministër i Kulturës Rinisë dhe Sportit në deklarimin e pasurisë për vitin 2017, ka deklaruar 9 mijë euro, kurse në emër të fëmijëve 3 mijë euro.
Ai posedon katër vetura në bashkëpronësi: një në vlerë 13 mijë euro, një 10 mijë euro, 6 mijë euro dhe tjetrën 5 mijë euro.
Dardan Gashi, ministër i Diasporë, në vitin 2015, kur ka ushtruar postin e ministrit të Mjedisit dhe Planifikimit Hapësinor, ka deklaruar 8 mijë euro, kurse në emër të bashkëshortes 5 mijë euro. Ai ka deklaruar veturë në vlerë 7 mijë euro.
Ivan Teodosjeviq, ministër i Administrimit dhe Pushtetit Lokal, edhe në kohën që ushtronte këtë detyrë në qeverinë “Mustafa”, ka deklaruar se posedon veturë në vlerë 8500 euro, ndërsa nuk ka deklaruar llogari bankare.
Mahir Jagxhilar, ministër i Administratës Publike, ka deklaruar veturë të tipit Modus në vlerë 6 mijë euro, ndërsa nuk ka deklaruar para në bankë.
Nenad Rikalo, ministër i Bujqësisë, si anëtar i Komisionit Qendror të Zgjedhjeve nuk ka deklaruar se posedon as veturë e as para të gatshme, por një kredi.
Ndërkaq, pasi nuk kanë qenë më herët pjesë e institucioneve dhe nuk kanë deklaruar pasuri në vitet e shkuara, ministri i Punëve të Brendshme Flamur Sefaj, i Punës dhe Mirëqenies Sociale, Skender Reçica, i Arsimit Shyqeri Bytyqi, i Zhvillimit Ekonomik, Valdrin Lluka dhe ministrit të Zhvillimit, Rural Rasim Demiri. /tesheshi.com/
