Nga Blendi Gashi
Behgjet Pacolli, me marrëveshjen e arritur me Kadri Veselin e Ramush Haradinajn për qeverinë e re ka bërë një pazar tejet të favorshëm për partinë e tij Aleanca Kosova e Re. Duket se Pacolli ka treguar cilësitë prej biznesmeni, pasi ka marrë një post zv.kryeministri, pesë ministri dhe shtatë zv.ministra në këmbim të tre votave që i ka dhënë “koalicionit të luftës”.
Pacolli ka thënë se vendimin për të bashkëqeverisur me PAN-in e ka marrë për të mirën e qytetarëve, për të zhbllokuar institucionet, ndërsa ka premtuar se do të punoj fuqishëm në ngjalljen e ekonomisë së brishtë, për anëtarësimin e vendit në OKB, për liberalizimin e vizave, për hyrjen në UNESCO, në Interpol, e organizata tjera.
Përkundër premtimeve të tilla të Pacollit, drejtues të organizatave jo qeveritare dhe analistët janë skeptik se ai do të mund të rrisë performancën e qeverisë, pasi ka pasur poste të larta edhe në qeverinë “Thaçi” dhe nuk ka lënë ndonjë gjurmë të madhe.
Shemsi Jashari, drejtor ekzekutiv i rrjetit të organizatave joqeveritare “Demokracia fillon këtu”, mendon se shanset që Pacolli të ndryshojë përformancën e qeverisë “Haradinaj”, janë minimale, pavarsisht se ka marrë një pjesë më të madhe në qeverisje se fuqia politike që ka.
“Kontributi dhe roli i AKR-së për momentin është hipotetik. Nuk është hera e parë që do të drejtojë Ministri, pasi ka qenë pjesë e qeverive të mëparshme dhe kishim rast të shihnim menaxhimin e disa dikastereve, por nuk është shquar për ndonjë punë të dalluar. Tani kohët dhe rrethanat janë të tjera dhe mbetët të shihet përformanca e tyre. Nëse z.Haradinaj do të lejonte që ministrat e AKR-së të mbetën në dorë të z.Pacolli gjasat janë minimale në përformancën e qeverisë në ardhje. Megjithatë pas 100 ditëshit të parë do shihet se ç’drejtim do të marrë kjo qeveri. Besoj shumë që z.Haradinaj do të jetë njëri nga kryeministrat më punëtor që qeveria e Kosovës ka pasur ndonjëherë”, thotë Jashari për tesheshi.com.
Sipas tij, puna e qeverisë “Haradinaj” nuk do të varet vetëm nga votat e partisë së Pacollit, por edhe nga votat e subjekteve tjera.
“Duke e parë afërsinë dhe kooperimin e z. Haradinaj edhe me partitë tjera në opozitë edhe me deputet të caktuar, besoj se nuk do varet çdo herë vetëm nga votat e deputetëve të AKR, për shumicën e ligjeve që janë jetike për qytetarët”, thotë Jashari.
Seb Bytyqi, ligjëruesi i shkencave politike në Universitetin e Uinçesterit në Angli, nuk beson se qeveria e re do të ketë performancë më të mirë se të kaluarat.
Ai thotë se të gjitha partitë që kanë lidhur marrëveshje bashkëqeverisëse kanë qenë në qeveri dhe nuk kanë dalluar shumë në mënyrën e qeverisjes.
“Nuk mund të pritet që AKR ta ndryshojë qeverinë e re, pavarësisht numrit të ministrive që ka. Ajo që mund të pritet është më shumë nga gjella e njëjtë që kemi parë deri tani, pavarësisht asaj se sa ministri ka. Një nga qëllimet kryesore të marrëveshjes është që Pacolli të bëhet president. Aty mund të ndodhin thyerje në të ardhmen. Sidoqoftë, me futjen e deputetëve të AKR-së në qeveri dobësohet fuqia e saj, sepse zëvendësimet janë nga LDK. Pra AKR ka një numër të vogël të deputetëve me të cilët mund ta shantazhojë qeverinë. Kjo qeveri do të ketë nevojë për ndihmën e LDK-së për ligje të rëndësishëm”, thotë Bytyqi për tesheshi.com.
Kujtojmë se AKR-ja e Pacollit në qeverinë e re do të udhëheqë pesë Ministri: të Jashtmen, Brendshmen, të Zhvillimit Ekonomik, të Bujqësisë dhe Planifikimit Hapësinor. Po ashtu do të ketë edhe shtatë zv.ministra dhe marrëveshja parasheh gjithashtu që PAN të mbështesë kreun e AKR-së të bëhet president i ardhshëm i vendit. /tesheshi.com/
