Kryeministri i ri turk, Binali Jëlldërëm, së bashku me qeverinë e tij, ka marrë votëbesimin sot në parlament.
Qeveria e 65-të e Turqisë ka marrë 315 vota pro në Asamblenë e Madhe Kombëtare, ndërsa 138 deputetë kanë votuar kundër saj.
Vetëm 453 deputetë morën pjesë në votimin e sotëm, në parlamentin me 550 vende.
Në fjalën e tij para deputetëve, kryeministri e çmoi qeverinë e re si të të gjithë turqve, duke dhënë mesazhe bashkimi pavarësisht kundërshtive: “Si qeveri të AKP-së, ne kemi një veçori karakteristike: nuk ka rëndësi sa vota marrim në zgjedhje, ne bëhemi qeveri e të gjithëve. Pas sigurimit të votëbesimit nën këtë strehë, ne bëhemi qeveri e 79 milionë [qytetarëve].”
“Do të lëvizim për ta forcuar demokracinë tonë; do t’i çojmë përpara liritë dhe të drejtat njerëzore. Do të punojmë ditë e natë për unitetin e kombit, për solidarësinë dhe vëllazërinë,” premtoi ai.
Binali Jëlldërëm e bëri të ditur përbërjen e qeverisë së re më 24 maj, dy ditë pasi u zgjodh kryetari i AKP-së në kongresin e jashtëzakonshëm. Ai pason në të dy postet Ahmet Davutogllunë, të dorëhequr më herët gjatë këtij muaji. /tesheshi.com/
