Lëvizja Vetëvendosje nuk përjashton protestat nëse Hashim Thaçi nuk i jep mandatin për krijimin e qeverisë pas dështimit eventual të koalicionit PDK-AAK-Alternativa.
Këtë e paralajmëron Shqipe Pantina, e cila thotë se roli i presidentit është që mos të lejojë krizë institucionale.
Ajo në një intervistë për tesheshi.com flet për seancën e 3 gushtit, takimet që po zhvillojnë me LDK-në e Isa Mustafës, me temat që do të merren nëse bëjnë qeverinë e çështje tjera.
Intervistoi: Blendi Gashi
Të enjten mbahet seanca konstituive e Kuvendit. A pritni që të votohet kryekuvendari si dhe kryeministri?
Seanca konstituive përveç betimit të deputetëve pikë kryesore të rendit të ditës ka zgjedhjen e kryetarit dhe kryesisë së Kuvendit, sepse pa përfundimin e këtij procesi nuk konsiderohet Kuvendi i konstituuar. Se a do zgjedhet apo jo kryetari të enjten varet se kush do jetë kandidati i propozuar nga koalicioni PAN. Ndërsa sa i përket zgjedhjes se qeverisë ajo nuk mund të bëhet në këtë seancë, për këtë duhet të thirret seancë e re pas konstituimit të Kuvendit
Nëse nuk votohet kandidatura e Veselit dhe PDK kandidon Xhavit Halitin apo Flora Brovinën do ishin të pranueshëm për ju si VV?
Mendoj se brenda koalicionit PAN ka kandidatë më të pranueshëm se emrat e përmendur më lartë. Sidoqoftë ne deri me tani në grupin parlamentar kemi diskutuar vetëm për kandidaturën e Veselit qe ka qenë e përfolur në medie dhe për këtë kemi vendim të mos e votojmë.
Nëse PAN dështon të krijoi institucionet, a ka gjasa vendi të hyn në krizë politike kur presidenti Thaçi ka lënë të nënkuptohet se nuk i jep mandatin një partie/koalicioni tjetër?
Roli i presidentit është krejtësisht e kundërta d.m.th që mos të lejojë krize institucionale. Kurse ajo që po tenton të bëjë Thaçi është krijimi i një krize mund të i shërbej atij apo partisë së tij ku ndonëse ai nuk është formalisht pjesë ai ende vazhdon të jetë njeriu kryesor i saj. Në krizë është vetëm PDK e cila ka dal humbësja më e madhe e këtyre zgjedhjeve. Ndërsa Kosova ka gjasa të jetë në krize p.sh. energjetike si pasojë e korrupsionit e keqmenaxhimit të partisë së Thaçit për vite të tëra, kjo është çka duhet ta preokupojë edhe presidentin.
Nëse kjo ndodhë, mund të organizon VV protesta siç ka paralajmëruar kolegu juaj Konjufca?
Unë mendoj se ka një vetëdije më të lartë qytetare në Kosovë dhe do jenë vet qytetarët që do organizohen në mbrojtje të kushtetutshmërisë në vend. Natyrisht se edhe Lëvizja Vetëvendosje do organizohet dhe nëse është e nevojshme edhe do mbajmë protesta.
Kurti ka thënë se “e kemi përkrahjen e ambasadorëve për krijimin e qeverisë”. Cilët ambasadorë i kanë ofruar mbështetjen? Si janë raportet me miqtë ndërkombëtarë?
Shtetet mike të Kosovës në vazhdimësi kanë ofruar mbështetjen e tyre për popullin tonë. Edhe kësaj here përmes të dërguarve të tyre në Kosovë, pra ambasadorëve po e bëjnë të njëjtën gjë, po përkrahin vullnetin e popullit të Kosovës, i cili vullnet u shpreh në zgjedhjet e 11 qershorit.
Pushtetin synoni ta bëni me LDK-në e Isa Mustafës të cilin e keni kritikuar jashtëzakonisht shumë vitet e fundit për keqqeverisje. Si po ecin takimet dhe ç’rezultate ka deri më tani?
Ne kemi kritikuar vendimet që nuk kanë qenë në favor të vendit dhe të qytetarëve dhe këtë e kemi bërë pa dallim kush i ka sjellë ato vendime, ashtu siç kemi përkrahë çdo vendim, ligj apo të ngjashëm që kanë qenë në të mirë të Kosovës dhe qytetarëve të saj. Sa i përket takimeve me LDK janë mbajtur disa në nivelin politik dhe presim që pas konstituimit të Kuvendit ku pritet që PAN të dështoj në formimin e qeverisë, të intensifikohen takimet me LDK për formimin e qeverisë
Nëse vini në pushtet, cilat do jenë tre temat kryesore që do filloni mandatin? Po me Demarkacionin e Asociacionin si do veproni?
Ne tashmë i kemi prezantuar 40 prioritetet për Republikën të cilat i kemi promovuar gjatë fushatës. Aty flitet edhe për zgjidhjen e Demarkacionit. Asociacioni besojmë se ka marrë tashmë përgjigje me vendimin e Gjykatës Kushtetuese.
Ditët e fundit PDK ka bërë akuza ndaj VV-së për keqpërdorime në Komunën e Prishtinës? Duke qenë se edhe si deputete keni ngritur zërin kundër korrupsionit e krimit, si ju kundërpërgjigjeni?
PDK është në panik të madh dhe ende nuk po di të sillet në rolin e saj të ri si opozitë. Ata po mundohen të gjejnë një fajtor për humbjen që pësuan me 11 qershor, por kanë zgjedhur kartën e gabuar. Ka dhjetëra raporte ndërkombëtare dhe vendore që vlerësojnë lartë qeverisjen e Vetëvendosjes dhe Shpend Ahmetit në Prishtinë mu për shkak të luftimit të korrupsionit. Besoj se PDK ka kohë dhe do adaptohet edhe me të qenit partia e dytë apo e tretë në vend, ju duhet edhe pak kohë për këtë.
Të kalojmë tek zgjedhjet lokale të 22 tetorit. Aktualisht udhëheqni komunë e Prishtinës. Ç’rezulate pritni, pra edhe sa komuna besoni se do t’i qeverisni pas zgjedhjeve?
Në zgjedhjet e 11 qershorit ne kemi dalë të parët në dhjetë komuna, mendoj se ky rezultat do jetë bile edhe më i mirë në zgjedhjet lokale. Por jam e sigurt se ne do kemi rritje të numrit të asamblistëve në të gjitha komunat.
Ju vini nga komuna e Klinës, do jeni kandidate për kryetare apo jo?
Javën tjetër ne do i kemi zgjedhjet e brendshme për kandidatin për kryetar të komunës së Klinës. Klinës i duhet një kryetar që e ndërron tërësisht mendësinë e qeverisjes atje, dhe unë mendoj se LVV ka kandidatë që mund të qeverisnin shumë mirë me Klinën. Ka 18 vite që unë nuk jetoj në Klinë dhe jam shkëputur pak nga problemet atje, prandaj mendoj se nuk do isha kandidatja më e mirë, sidoqoftë për këtë do vendosin anëtarësia e LVV-së në Klinë. /tesheshi.com/
