Nga Blendi Gashi
Pas përplasjeve në seancën e 24 gushtit dhe më pas, Vetëvendosje dhe LDK-ja iu rikthyen qetësisë duke i hapur rrugën një bashkëpunimi për të formuar qeverinë e re, në rast se dështon koalicioni PDK-AAK-NISMA.
Për këtë mundësi bashkëpunimi, e cila ndodhi menjëherë, “fajtor” është kreu i PDK-së Kadri Veseli, i cili tha hapur se i jep votën Albin Kurtit për ta bërë qeverinë nëse ky i fundit arrin të bëjë 60 vota tjera, duke aluduar në një bashkëpunim të pamundshëm mes partisë së Visar Ymerit e Isa Mustafës.
Dhe pas dritës së gjelbërt të dhënë nga Mustafa, i cili tha se fatin e shtetit nuk e lidh me inatet personale, duke sjellë në vëmendje sulmet e mëparshme nga Vetëvendosje, LDK përmes nënkryetarit Lutfi Haziri nisi betejën së bashku me vetëvendosësit për ta mundur Veselin dhe dërguar partinë e tij në opozitë.
Megjithëse bisedat aktualisht janë në fazën fillestare dhe pritet të vazhdohen në ditët e ardhshme, jo të gjithë në LDK besojnë se ato do rezultojnë të suksesshme.
Dhe një prej tyre është nënkryetari tjetër i kësaj partie, Agim Veliu i cili nuk është optimist se do të ketë diçka pozitive në këtë aspekt.
“Me Vetëvendosjen, LDK-ja ka dallime shumë të mëdha. Ka çështje që duhet të përmbyllen paraprakisht edhe nuk besoj se është shumë e lehtë kjo punë”, tha ai.
Skeptikë për arritjen e një marrëveshjeje të tillë shprehen edhe analistët politikë.
Politologu, Mentor Tahiri, thotë se teorikisht dy forcat politike VV dhe LDK, plus aleatët, janë në gjendje të formojnë të vetëm qeverinë, mirëpo sipas tij zhvillimet e deritanishme në Kuvend kanë bërë goxha të dyshimtë faktin nëse këto dy forca politike mund të bëjnë 61 vota, për shkak se Teuta Rugova është rreshtuar nga PAN dhe të njëjtën rrugë po ndjek edhe një deputet nga AKR.
Sipas Tahirit, bisedimet ndërmjet këtyre forcave politike, deri tani kanë qenë më shumë perceptim i opinionit bazuar në pritshmëri, por që realisht në fakt një dinamikë serioze të tyre nuk ka pasur. Madje ai shton se vonesa në bisedime ka efektin për të dëshmuar mungesën e seriozitetit politik.
“Në kontekstin e një shumice parlamentare të përbërë nga VV dhe LAA, nëse diçka e tillë do të ketë sukses për të funksionuar, nuk duhet përjashtuar edhe pjesëmarrjen e NISMA-s. Sinjalet politike të lëshuara nga disa deputet të saj, duhen kuptuar ndërmjet rreshtave si një gatishmëri për të qenë pjese e një shumice parlamentare, në kuadër të të cilës janë edhe shumica e deputetëve shqiptar në Kuvend”, thotë Tahiri.
Analisti politik, Albinot Maloku, thotë se raporti i deritanishëm mes Vetëvendosje-s dhe koalicionit LAA ka qenë i paemër dhe nuk është vërejtur një tangente bashkëpunimi, e cila do të mund të konsiderohej partneritet apo koalicion.
Sipas tij, kundërshtimet mes këtyre dy forcave nuk janë vetëm politike, por edhe programore.
“Lëvizja Vetëvendosje disa herë i ka bërë ftesë koalicionit LAA për bashkëpunim, edhe pse kjo ftesë nuk ishte e një respekti të ndërsjellë, por më shumë e interesit momental. Vetëvendosje nuk është se i ka lënë derë të hapur vetes për ndonjë bashkëpunim as me LDK-në si partia më e madhe brenda koalicionit LAA.
Kurse me dy pjesëzat tjera të koalicionit LAA, pra me AKR-në e Alternativen, Lëvizja Vetëvendosje ka pasur bashkëpunime dhe nisur nga kjo, mund të shpresojë në ndonjë ndryshim qëndrimesh nga ana tyre. Kam dyshime se këto muhabetet mes LVV-së e LAA-së për bashkëpunim do të jenë frytdhënëse”, thotë Maloku për tesheshi.com.
Artan Murati, nga Instituti Demokratik i Kosovës, organizatë kjo që përcjellë punën e Kuvendit, për dallim nga analistët e sheh më të mundshme një bashkëqeverisje VV-LDK.
Sipas tij, përafrimi i këtyre partive është mëse i mundur, sidomos nëse vazhdon të thellohet kriza politike dhe mundësia që koalicioni PAN të mos i ketë numrat e nevojshëm për Kuvend dhe qeveri.
“Të dy subjektet në parim kanë shumë çështje të cilat i ndajnë në qëndrime, megjithatë konsideroj se përafrimi i këtyre dy taboreve është shumë më i mundshëm, sesa ndonjë përafrim potencial me PAN-in, duke pasur parasysh retorikën dhe veprimet e fundit të të gjitha subjekteve politike, me theks të veçantë në diskursin mes VV dhe PAN. Megjithatë, edhe ky përafrim i LAA me VV është i kushtëzuar me një dështim potencial të koalicionit PAN në krijimin e institucioneve dhe mandej edhe me nominimin e një kandidati nga LAA ose VV nga presidenti si i mandatuar për formimin e qeverisë”, thotë Murati për tesheshi.com. /tesheshi.com/
