Zijadin Sela duket se përfundimisht nuk do të jetë në qeverinë e ardhshme të Maqedonisë.
Në mediat shqiptare, por edhe atë maqedonase ka një frenezi emrash për ministra, por duket se përfundimisht shqiptarët do të kenë zv.kryeministrin për sistemin politik dhe marrëdhëniet mes komuniteteve.
Sipas qarqeve pranë BDI-së, që i referohen takimit që është zhvilluar sot mes Zoran Zaevit, Zijadin Selës dhe Ali Ahmetit, është rënë dakord që ish-kryetari i komunës së Tetovës të jetë edhe zv.kryeministri i ri. Ndërkaq, zv.kryeministri i dytë do të jetë Bujar Osmani, sërish nga BDI që do të drejtojë negoçiatat me BE-në.
Adnan Jashari pritet të emërohet ministër i Drejtësisë, Sadulla Duraku pritet të emërohet ministër për Ambient Jetesor dhe planifikim hapsinor.
Ndërkaq shqiptarët do të kenë edhe Ministrinë për Ekonomi, ku pritet të emërohet një ekspert mjaft i shquar nga Kërçova që njihet mirë edhe nga Zoran Zaev dhe që ka punuar në organizatat ndërkombëtare. Emri i ministrit të ri po mbahet sekret nga mediat.
Gjirhashtu, shqiptarët do të kenë edhe ministrinë e Investimeve të huaja.
Ndërsa nga partia e Zijadin Selës, Arben Taravari, mjeku dhe miku i Zijadin Selës që i qëndroi pranë gjatë incidentit të 27 prillit do të emërohet ministër i Shëndetësisë, kurse Vesel Memedi do të jetë ministri i ri i Vetëqeverisjes Lokale.
Duket se këtë herë shqiptarët po zënë gjithnjë e më shumë hapësira jetike të qeverisë, jo vetëm në ato dikastere që kanë të bëjnë për kuotat e pakicave, por në sektorët kardinalë siç janë ekonomia dhe financat e vendit.
Dhe në fakt shqiptarët e Maqedonisë janë në krye të sektorit ekonomik pasi pa ndihmën e shtetit janë shquar si menaxherë e biznesmenë të zotë. /tesheshi.com/
