Ndërsa politika kosovare po përjeton një ngërç të radhës, kësaj here nga pamundësia e një koalicioni siç është PAN, për të formuar qeverinë e re me kryeministër Ramush Haradinajn, nën hyqmin e Kadri Veselit, Vetëvendosje që doli si veçmas si parti me rezulatin më të mirë zgjedhor, e që pretendon të marrë në dorë frenat e qevrisjes me Albin Kurtin-kryeministër, ka arritur të marrë së fundi një vëmendje ndërkombëtare, e cila mund të lexohet dhe si mbështetje ndaj saj, në realitetin e ri politik të krijuar. Ndodh kjo, pikërisht me një forcë politike që është parë si “delja e zezë” për ndërkombëtarët, prej karakterit të saj marksist në formën e të bërit politikë.
Dhe është pikërisht Brukseli që i ka hapur dyert, aty ku “merret viza” për ardhjen në pushtet
Një delegacioni i VV-së i përbërë nga Visar Ymeri, Albin Kurti dhe Shpend Ahmeti, është pritur në takim edhe nga eurodeputetët Tanja Fajon dhe Knut Fleckenstein, ku është diskutuar për procesin zgjedhor, rezultatet e zgjedhjeve dhe formimi i qeverisë së re bazuar mbi këto rezultate.
“Delegacioni i njohu eurodeputetët me prioritetet e programit qeverisës së Lëvizjes Vetëvendosje si dhe me faktin që tashmë Lëvizja Vetëvendosje është subjekti politik më i votuar në Kosovë me 32 deputetë në Kuvendin e ardhshëm. Eurodeputetët e përgëzuan delegacionin për këto rezultate duke diskutuar gjithashtu edhe për një bashkëpunim më të afërt dhe më intensiv mes Lëvizjes Vetëvendosje dhe social-demokratëve të Parlamentit Evropian”, thuhet në një deklaratë, ndërsa bëhet e ditur se krerët e VV-së do të vazhdojë edhe sot takimet në Bruksel.
Siç po shihet ditë pas dite, PAN nuk po mundet ta formojë dot qeverinë, dhe kjo ka sjellë një situatë të ngjashme si ajo në Maqedoni, kur për muaj me radhë, Zaev dhe Gruevski garuan se kush do marrë frenat e qeverisjes, derisa i pari triumfoi ndaj të dytit me anë të një mbështetjeje të fuqishme ndërkombëtare.
Më gjasë, ndërkombëtarët po japin sinjale angazhimi për t’i dhënë zgjidhje dhe situatës në Kosovë, që ta formojë sa më shpejt qeverinë e re.
Pritja në Bruksel e një shpurës së VV-së me Albin Kurtin në krye, është një sinjal i qartë i këtij angazhimi. /tesheshi.com/
