Pas hapjes së dosjeve, qeveria ka ndërmarrë një tjetër inisiativë që prek sensibilitetet e shtresës së të përndjekurve politikë: gjetjen e personave të zhdukur gjatë diktaturës.
Siç dihet, një numër i madh të ekzekutuarish në atë kohë kanë mbetur pa varr. Pra, trupat e tyre nuk dihet se ku janë. Inisiativat për t`i gjetur ato, deri më tani kanë qenë inisiativa private, më saktësisht të vetë familjarëve, që në bazë të të dhënave marrë në rrugë të ndryshme, kanë bërë kërkime, ku disa kanë rezultuar me sukses e disa jo.
Inisiativa shtetërore në fjalë, vjen pikërisht nga i njëjti dikastër që po merret dhe me “dosjet”; Ministria e Çështjeve Sociale, që drejtohet nga Erjon Veliaj.
Në një tryezë me këtë rast, zv.ministrja Gentjana Sula, tha se “shteti dhe shoqëria u ka borxh të gjithë atyre personave që sot e kësaj dite nuk kanë gjetur prehje”.
Për këtë proçes, do hapet një zyrë pranë Institutit të Integrimit të ish të Përndjekurve Politikë, e quajtur Zyra për Personat e Zhdukur.
Sipas zv.ministres Sula, hapja e kësaj zyre ka për qëllim të krijojë një databazë fillestare mbi personat e zhdukur, me të dhënat e tyre minimale si, emri, mbiemri, gjinia, vendi dhe data e lindjes, vendi dhe data ose (në pamundësi) viti i supozuar i zhdukjes dhe rrethanat e zhdukjes, si dhe të mbledhë informacione, të ndjekë dhe monitorojë procesin e kërkimit dhe zhvarrosjes së personave të zhdukur, duke bashkëpunuar dhe koordinuar me institucionet e tjera përgjegjëse.
Gjykuar politikisht, me të tilla inisiativa, siç janë “dosjet”, pagesat e rregullta që po u bëhen të përndjekurve, e tashmë dhe kjo inisiativë e fundit për gjetjen e të zhdukurve, qeveria po përpiqet ta ketë grurë me një shtresë delikate si ajo e të përndjekurve.
E ndërgjegjeshme për xanxën që ende ia ka lënë koha si e prejardhur nga ish-Partia e Punës, e majta e sotme në pushtet po gjen forma të tilla politike për t`u rehabilituar, sidomos përballë ish të përndjekurve, që dhe votat nuk i kanë të pakta. /tesheshi.com/
