Nga Bashkim Kastrati
Qeveria e Republikës së Kosovës ka paguar hiq më pak se 890 mijë euro në vitin 2017, si formë ndëshkimi, për shkak të mostërheqjes së mjeteve financiare nga institucionet ndërkombëtare financiare.
Kjo ka ndodhur pasi që Qeveria e Kosovës kishte nënshkruar marrëveshje për kredi me institucionet financiare ndërkombëtare në vlerë rreth 300 milionë euro, për financim të 10 projekteve kapitale, por mjetet e zotuara nuk janë tërhequr për shkak se projektet nuk kanë qenë të gatshme për financim.
Në një raport të publikuar nga Zyra Kombëtare e Auditimit, thuhet se si rezultat i kësaj, për mjetet e zotuara dhe të pashfrytëzuara, Qeveria obligohet të paguaj pagesa shtesë (tarifa zotimi).
Deri të kjo situatë ka ardhur kur Qeveria e Kosovës nuk ka qenë e gatshme që të tërheq borxhet e jashtme, në shumën prej 295 milionë euro. Rrjedhimisht për çdo vonesë në tërheqjen e këtyre kredive, qeveria paguan një tarifë zotimi, e cila për vitin 2017 arrin në 890 mijë euro.
Qeveria kishte hyrë në borxhe kryesisht për financimin e projekteve rrugore, energjetike, rehabilitimin e linjave hekurudhore dhe përmirësim të sistemit të arsimit dhe shëndetësisë, projekte këto që kanë dështuar së realizuari.
Por këto projekte nuk janë realizuar dhe një nga arsyet është se ka pasur një studim jo të mirë të fizibilitetit për këto projekte si dhe mangësitë në krijimin e parakushteve të nevojshme për eliminimin e të gjitha pengesave infrastrukturore dhe ligjore në realizimin e këtyre projekteve, për çka Qeveria duhet të ketë një mbikëqyrje të shtuar.
Auditi ka ardhur në përfundim se analizat e projekteve që planifikohen të financohen përmes huamarrjes nuk janë të mjaftueshme. Një numër i projekteve kapitale për të cilat Qeveria ka hyrë në marrëveshje ndërkombëtare kredie, nuk janë realizuar fare.
Qeveria po tallet me paratë e taksapaguesve
Ekonomisti Lulzim Beqiri thotë se pagimi i këtyre parave, përkatësisht humbja e tyre tregon se kjo qeveri po tallet me tatimpaguesit kosovarë.
“Sipas Zyrës Kombëtare të Auditimit janë 295,809,378 euro mjete të cilat nuk janë tërhequr/shpenzuar sipas marrëveshjeve të arritura me institucionet financiare ndërkombëtare, si pasojë e mospërputhjes së dinamikës kohore në mes të alokimit të kredive dhe realizimit të projekteve, vlera e paguar e tarifave të zotimit për mjetet e kredive të pa tërhequra nga huamarrësit arrin kuotën prej 890,000 euro. Pse marrin kredi kur nuk i shfrytëzojnë, si pasojë pastaj janë shpenzuar afro 900 mijë euro për tarifat e zotimit për mjetet e kredive të pa tërhequra”, thotë Beqiri.
Ai thotë se është e pakuptimtë të merren kredi, të mos shfrytëzohen dhe pastaj të paguhen para nga buxheti i Kosovës për mosshfrytëzimin e parave të kredive që janë marrë.
“Mendoj se kemi më shumë qeverisje impulsive se sa qeverisje me strategji konkrete”, thotë Beqiri.
Ai thotë se për tu ndalur keqpërdorimet me paranë publike dhe keqmenaxhimet që po i sjellin buxhetit të Kosovës dhjetëra miliona euro humbje, duhet që të ndërrohet gjenerata politike, por edhe mendësia qeverisëse.
“Kosovës i duhet një qeverisje e re nga një klasë e re e politikanëve, mjaft sakrifikuam me këta politikanë që na e qiten faqen e zezë, nuk ka qytetar që është i kënaqur me këtë garniturë që fatkeqësisht na ka ra hise gjeneratës sonë, andaj jam optimist se klasa e re e shoqërisë ka filluar të zgjohet nga gjumi dhe t’i ndalin këta politikan që në emër të luftës e disa edhe në emër të paqes janë duke e shkatërruar çdo gjë, janë duke vrarë çdo shpresë të qytetarëve të vendit”, theksoi Beqiri. /tesheshi.com/
